धनगढी । भारतीय एक्स्काभेटर नेपाली भूमीमा पुगाइएपछि विवाद भएको छ । महाकाली नदी तारेर भारतीय एक्स्काभेटर दार्चुला सदरमुकामस्थित महाकाली नगरपालिका–५ मा पुगाइएपछि विवाद भएको हो । 

स्थानीय बासिन्दाले अनुमतिबिना भारतीय ठेकेदार कम्पनीको एक्स्काभेटर ल्याइएको भन्दै मेसिनसहित चालकलाई नियन्त्रणमा लिएका थिए । उनीहरुले नेपाली भूमीममा भारतले काम गर्न खोजेको आरोप लगाएका छन् । 

दार्चुलाका प्रमुख जिल्ला अधिकारी यज्ञराज जोशीले भने भारतीय भूमीमै रहेको आफ्नो कार्यक्षेत्र जाने क्रममा भारतीय एक्स्काभेटर नेपाली सीमामा पुगेको जानकारी दिए । ‘भारतीय क्षेत्रमा नदी नियन्त्रणको काम भइरहेको छ,’ उनले भने, ‘भारततर्फ कार्यक्षेत्रमा जाने बाटो नभएपछि नेपाली भूमी हुँदै एक्स्काभेटर लैजान खोजिएको रहेछ । सोही क्रममा स्थानीयले देखेपछि नियन्त्रणमा लिएका थिए । अहिले फिर्ता पठाउने सहमति भइसकेको छ ।’