बैतडी । बैतडीमा एक वडा सदस्य पद रिक्त भएको निर्वाचन आयोगले जनाएको छ । आयोगका अनुसार जिल्लाको पाटन नगरपालिकामा एक वडा सदस्य पद रिक्त भएको हो । 

नेपाली कांग्रेसबाट २०७९ को स्थानीय तह निर्वाचनमा निर्वाचित रमेशराम कोली अन्य दलमा प्रवेश गरेको र उनलाई पार्टीले कारबाही गरेकाले उनको पद रिक्त भएको आयोगले सोमबार सूचना सार्वजनिक गरी जानकारी दिएको छ ।

कांग्रेसले अन्य दलमा प्रवेश गरेको भनी केन्द्रीय समितिको निर्णयको प्रतिलिपिसहित आयोगमा जानकारी गराएको थियो । सोही कागजातको आधारमा आयोगको यही पुस २३ गते बसेको बैठकले उनी निर्वाचित भएको दलित वा अल्पसंख्यक कोटाको सदस्य पद स्वतः रिक्त भएको निर्णय गरेको थियो ।