कञ्चनपुर । नेपाल राष्ट्रिय समाज कल्याण संघ (एनएनएसडब्ल्यूए)का संस्थापक अध्यक्ष तथा कार्यकारी निर्देशक अशोक विक्रम जैरू 'असहाय सेवा सहयोग पुरस्कार' बाट सम्मानित भएका छन् । सोमबार भीमदत्त नगरपालिकाको ४७ औँ स्थापना दिवसको उपलक्ष्यमा असहाय जेष्ठ नागरिक र बालबालिकाहरूलाई गरेको सहयोग तथा महिला सशक्तिकरणमा पुऱ्याएको महत्त्वपूर्ण योगदानको उच्च कदर गर्दै कार्यकारी निर्देशक जैरूलाई सम्मानित गरिएको हो । 

भीमदत्त नगरपालिकाका नगरप्रमुख पदम बोगटी, उपप्रमुख नीलम लेखक जोशी र प्रमुख प्रशासकीय अधिकृत महेश बहादुर बमले कार्यकारी निर्देशक जैरूलाई दोसल्ला ओढाएर प्रमाण पत्रसहित सम्मान गरे ।

जैरू विगत ३५ वर्षदेखि दलित, अपाङ्गता भएका व्यक्तिहरू र पछाडि परेका समुदायहरु आरक्ष पिडित, मुक्तकमैया, मुक्त कमलरी, महिला, बालबालिका, एचआईभी संक्रमित र कुष्ठरोग प्रभावित व्यक्तिहरुका लागि विकास तथा मानव अधिकारमूखि कार्य गर्दै आएका छन् । 

सम्मान ग्रहणपश्चात् कार्यकारी निर्देशक जैरूले समतामुलक समाज निर्माण गर्ने दिशामा काम गर्ने थप हौसला र उर्जा मिलेको बताए ।