डोटी । डोटीमा जिप दुर्घटना हुँदा दुई जना घाइते भएका छन् । जिल्लाको बोगटान फुड्सिल गाउँपालिका–३ धुलाचौरस्थित भित्री सडक खण्डमा सोमबार राति बोलेरो जिप दुर्घटना हुँदा दुई जना घाइते भएका हुन् ।

दुर्घटनामा परि बोगटान फुड्सिल गाउँपालिका–३ कानाचौर निवासी ३० वर्षीया ज्ञानकुमारी बोहरा र सप्तरी कंकाली नगरपालिका–४ निवासी २४ वर्षीया काजल मण्डल घाइते भएका छन् । ज्ञानकुमारी बोहराको दायाँ आँखा, टाउको र दायाँ हातमा चोट लागेको छ भने काजल मण्डलको दुवै खुट्टा र घाँटीमा चोट लागेको छ । दुवैको अवस्था मध्यम रहेको बताइएको छ ।

घाइतेहरूलाई स्थानीय स्वास्थ्य चौकीमा प्राथमिक उपचारपछि थप उपचारका लागि धनगढी रेफर गरिएको छ । जोरायल डोटी घर भएका बोलेरोका चालक अर्जुन मल्ल सामान्य घाइते भएका छन् र उनको पनि उपचार भइरहेको छ । दीपायलबाट कानाचौरतर्फ जाँदै गरेको से १ ज ८३८ नम्बरको बोलेरो जिप ब्रेक फेल भएर सडकबाट करिब २० मिटर तल खसेको थियो ।