धनगढी । डोटीमा मोटरसाइकलको ठक्करबाट एक किशोर घाइते भएका छन् । सोमबार बेलुकी शिखर नगरपालिका-६ अडेउल बजारस्थित डा.केआईसिंह राजमार्गमा मोटरसाइकलको ठक्करबाट सोही ठाउँका १४ वर्षीय रिवाड सिंह घाइते भएका हुन् । 

उनलाई दिपायलबाट डडेल्धुरातर्फ जाँदै गरेको दिपायल सिलगढी नगरपालिका-१ तिखा बस्ने २९ वर्षका शैलेन्द्र खड्काले चलाएको से ५ प १३८२ नम्बरको मोटरसाइकलले ठक्कर दिएको प्रहरीले बताएको छ । 

मोटरसाइकलको ठक्करबाट घाइते भएका रिवाडलाई स्थानीय स्वास्थ्य चौकीमा सामान्य उपचारपश्चात थप उपचारको लागि शैलेश्वरी अस्पताल दिपायल पठाएको र अवस्था सामान्य रहेको जिल्ला प्रहरी कार्यालय डोटीले बताएको छ ।