धनगढी । कैलालीको गोदावरी नगरपालिका–१ मा सुत्केरी व्यथाले छट्पटाइरहेको अवस्थामा भेटिएकी महिलालाई सुत्केरी गराउने प्रहरी जवानलाई प्रहरी महानिरीक्षक (आईजीपी) ले पुरस्कृत गरेका छन् ।

आईजीपी दीपक थापाले सडक छेउमा सुत्केरी गराउन सहयोग गर्ने प्रहरी जवान चन्द्रिकाकुमारी देउवालाई पुरस्कृत गरेका हुन् । उनको यो कामले प्रहरीको छविलाई उँचो बनाउने काम गरेको भन्दै आईजीपी थापाले पुरस्कृत गरेका हुन् ।

यसअघि जिल्ला प्रहरी कार्यालय कैलालीले बुधबार देउवालाई प्रसंशापत्र र रेकर्डमा जाने गरी पुरस्कृत गरेको थियो । प्रहरी चौकी खैरानामा कार्यरत प्रहरी जवान देउवाले सडकमा छट्पटिरहेको चन्द्रा आचार्यलाई सुत्केरी गराएकी थिइन् । आचार्यलाई पनि पद्‍मा अस्पताल पुर्‍याइएको थियो ।