नेपाली कांग्रेसको १५औं महाधिवेशन गर्न लगभग सहमति जुटेको छ । सभापति शेरबहादुर देउवा र कार्यवाहक सभापति पूर्णबहादुर खड्काले नेताहरूसँग छलफल गरेर महाधिवेशनको कार्यतालिकाबारे लगभग सहमति जुटाएका हुन् । 

पुस अन्तिम साता नियमित महाधिवेशन गर्ने विषयमा छलफलमा सहमति जुटेको बताइएको छ । तर यो प्रस्तावलाई पूर्वउपसभापति विमलेन्द्र निधि र पूर्वमहामन्त्री कृष्णप्रसाद सिटौलाले अस्वीकार गरिरहेका छन् ।

शनिबारको छलफलमा सभापति देउवाले आफूले मंसिरमै नियमित महाधिवेशन गर्न चाहेको बताएका थिए । त्यसैकारण असोज २८ गते आफूले उपसभापति पूर्णबहादुर खड्कालाई कार्यवाहक तोकेको र समयमै महाधिवेशन गर्ने भनेको उनको भनाइ थियो । ‘मैले पार्टीको १५औं महाधिवेशन मंसिरमै गर्नु भनेको हो। तपाईंहरूले किन गर्नुभएन ? विधानअनुसार महाधिवेशन गर्ने भनेको मंसिरभित्रै गर्ने भनेको हो । समय नथपी गर्ने भनेको हो । मैले छोड्छु भनिरहेको छु भने मलाई किन तपाईंहरूले सन्तोषले छोड्न दिइराख्नुभएको छैन ?,’ एक नेताका अनुसार शनिबार देउवा निवासमा भएको छलफलमा सभापतिले भनेका थिए ।