धनगढी । नेकपा एकीकृत समाजवादीले कैलालीका १३ वटै पालिकाको भेला तथा अधिवेशन गर्ने भएको छ । धनगढीमा मंगलबार बसेको जिल्ला कमिटी बैठकले स्थानीय पालिका तथा वडा अधिवेशनहरु फागुन मसान्तभित्र सम्पन्न गर्ने निर्णय गरेको हो ।

पार्टीका प्रदेश अध्यक्ष हर्कबहादुर सिंहको प्रमुख आतिथ्यतामा भएको बैठकले १० गते मोर्चा संगठनको बैठक राख्न तथा जनवर्गीय संगठनको अधिवेशन, भेला, बैठकहरु तत्काल बोलाउन निर्देशन समेत गरेको छ । पार्टीले यही माघ ११ गते गौरीगंगा नगर कमिटीको भेला गर्ने निर्णय गरेको छ ।

त्यस्तै १२ गते चुरे गाउँपालिकाको भेला, माघ १६ गते टीकाकापुर नगर कमिटी, जानकी र जोशीपुर गाउँ कमीटिको बैठक तथा माघ १९ गते गोदावरी नगर कमिटीको भेला गर्ने निर्णय गरेको छ । त्यस्तै माघ २५ गते बर्दगोरिया गाउँ कमिटीको अधिवेशन, माघ १८ गते धनगढी उपमहानगर कमिटीको भेला, माघ २८ गते भजनी नगरकमिटीको अधिवेशन, माघ १७ गते घोडाघोडी नगर कमिटीको भेला गर्ने निर्णय भएको एकीकृत समाजवादीले जनाएको छ ।

एकीकृत समाजवादीका जिल्ला अध्यक्ष बिमल जोशीको अध्यक्षतामा भएको बैठकलाई पार्टीका पोलिटब्यूरो सदस्य तथा कैलाली इन्चार्ज दीर्घ सोडारीले सम्बोधन गरेका थिए । बैठकमा प्रदेश सचिव दिनेशचन्द्र सुवेदी, पोलिटब्यूरो सदस्य चुनकुमारी चौधरी, केन्द्रीय सदस्य लक्ष्मी चौधरीलगायत नेताहरुको उपस्थिति रहेको थियो ।

बैठकको सञ्चालन जिल्ला सचिव दीर्घ जोशीले गरेका थिए । बैठकमा सहभागीहरुले पालिकामा पार्टीका गतिविधिबारे रिपोर्टिङ गरेका थिए ।