धनगढी । थारू ककला, संस्कृति तथा पहिचान संरक्षण सम्बर्ध्दनका लागि गोदावरीको मजगाउँमा माघ महोत्सव २०८१ आयोजना गरिने भएको छ ।

थारू कल्याणकारिणी सभा र बरघर भलमन्सा गोदावरी नगरसमितिको आयोजना तथा मजगाउँ थारु सामुदायिक होमस्टे र न्यू खुटिया चारपाटे युवा क्लबको सहकार्यमा गोदावरी–८ मजगाउँमा माघ महोत्सव आयोजना गरिदैछ । यहि माघ १२, १३ र १४ गते आयोजना गरिने महोत्सव उद्घाटन सुदूरपश्चिम प्रदेशका मुख्यमन्त्री कमलबहादुर शाहले गर्ने थारु कल्याण कारिणी सभा गोदावरी नगर अध्यक्ष जनकलाल चौधरीले बताए ।

थारू समुदायको लोककला, संस्कृति, गीत, रितीरिवाज, चालचलन, बोलीभाषा र खानपानका परिकारहरू महोत्सवको प्रमुख आकर्षण रहने अध्यक्ष चौधरीले बताए । उनले स्थानीय सांस्किक भाँकीहरू प्रदर्शन गरिनुका साथै थारू राष्ट्रिय कलाकारहरुको प्रस्तुति रहने बताए । थारू कला संस्कृतिको जगेर्ना सम्बन्धी विविध कार्यक्रम, थारू समाज सेवा तथा प्रतिभावान व्यक्तिहरुलाई सम्मान गरिनुका साथै चर्खा, रोटेपिङ लगायत रमाइलो मेला र कृर्षि उपज प्रदर्शनी स्टलको व्यवस्था गरिएको उनले बताए ।

थाकस कैलालीका पूर्व सभापति माधव चौधरीले थारू समुदायको संस्कृति संरक्षण तथा ऐतिहासिक बस्तुहरु जगेर्नामा महोत्सवको योगदान रहेके बताए । विगतमा पनि महोत्सव आयोजना गरिएको बताउँदै उनले स्थानीय पर्यटन प्रबर्धन, आधुनिक कृषि प्रवर्ध्दन र पर्यावरण संरक्षणका लागि पनि महोत्सव आयोजना गरिदै आएको बताए ।