धनगढी । नेकपा एमालेको अछामस्थित साँफेबगर नगरपालिकाको नगर कमिटी डा. भीम रावलको मातृभूमि जागरण अभियानमा समाहित भएको छ । शनिबार सो नगर कमिटी अभियानमा समाहित हुने निर्णय गरिएको हो । 

रावलको उपस्थितिमा शनिबार अभियानको साँफेबगर तदर्थ नगर कमिटी गठन गरिएको छ । ढकेन्द्र कुँवरको संयोजकत्वमा तदर्थ कमिटी गठन गरिएको हो । 

यस्तै सोही नगरपालिकाको वडा नम्बर ६ को एमाले कमिटीका पदाधिकारी पनि अभियानमा लागेका छन् । यसअघि साँफेबगर नगरपालिका–८ को सिंगो वडा कमिटी उक्त अभियानमा समाहित भएको थियो । एमालेको उक्त वडा कमिटीलाई नै मातृभूमि जागरण अभियानको वडा समितिमा रुपान्तरण गरिएको छ ।

एमाले वडा कमिटी अध्यक्ष शम्भुबहादुर कुँवरको अध्यक्षतामा बसेको बैठकले उक्त निर्णय गरेको हो । यस्तै, वडा नम्बर १० को एमाले कमिटी पनि मातृभूमि जागरण अभियानमा समाहित भएको छ । सोही कमिटीलाई उक्त अभियानको वडा समिति बनाइएको हो ।

नेकपा एमालेबाट निष्कासनमा परेपछि डा. रावलले मातृभूमि जागरण अभियान थालेका छन् । उनलाई एमालेबाट निकालिएसँगै सुदूरपश्चिमका जिल्लाहरूमा त्यसको प्रभाव परेको छ । अछाम सबैभन्दा धेरै प्रभावित भएको छ ।