धनगढी । सुदूरपश्चिमको एकमात्र उपमहानगर धनगढी र स्थायी राजधानी घोषणा गरिएको गोदावरी नगरपालिकालाई जोड्दै छ लेन सडक निर्माण गरिएको छ । धनगढी उपमहानगरले यसअघि नै आफ्नो क्षेत्रमा पर्ने छ लेन सडकलाई बत्तीको झिलिमिलीमार्फत सौन्दर्यकरण गरिसकेको छ । 

गोदावरी नगरपालिकाले पनि चालु आर्थिक वर्षभित्र नै छ लेन सडक खण्डमा सडक बत्तीसँगै रङ्गीचङ्गी बनाउने तयारी थालेको छ । सोहीअन्तर्गत सुदूरपश्चिम प्रदेशका सात पहाडी जिल्लाको प्रवेशद्वारका रूपमा रहेको अत्तरिया चोकले नयाँ स्वरूप पाएको छ । 

अत्तरिया चोकमा हाइमास्ट लाइटसँगै ४० वटा पोलहरुमा रङ्गीविरङ्गी बत्ती जडान गरिएको छ । त्यो संगै अत्तरिया बजारको मुख्य चौराहा क्षेत्रका सडक बत्तीले रातको समयमा झिलिमिली बनेको छ ।

अत्तरिया चोकमा सेतो, नीलो र रातो रङको स्ट्रिप लाइट बल्न थालिएको छ । नगरपालिकाले पछिल्ला दुई वर्षदेखि चोकलाई व्यवस्थित र रमणीय बनाउने योजना अगाडि बढाएको थियो । 

अनियन्त्रित रूपमा टाँसिएका विज्ञापन बोर्ड तथा पम्प्लेट हटाउने, नियमित सरसफाई गर्ने, विभिन्न प्रजातिका विरुवा रोप्ने, वाटर फाउन्टेन निर्माण गर्ने र हाइमास्ट लाइट जडानसँगै रातको समयमा रङ्गीचङ्गी देखिने गरी बत्ती जडान गर्ने काम सम्पन्न भएको हो । 

गोदावरी नगरपालिकाका नगरप्रमुख बीरेन्द्र भट्टका अनुसार अत्तरिया चोक सुदूरपश्चिमको महत्वपूर्ण ट्रान्जिट प्वाइन्ट भएकाले त्यसको सौन्दर्यकरणलाई प्राथमिकता दिइएको हो ।