धनगढी । सुदूरपश्चिम प्रदेशका उद्योग पर्यटन वन तथा वातावरणमन्त्री लक्ष्मणकिशोर चौधरीले पदबाट राजीनामा दिएका छन् । मन्त्रालयमा पत्रकार सम्मेलन गर्दै मन्त्री चौधरीले राजीनामा दिएको घोषणा गरेका हुन् । त्यसपछि उनले मुख्यमन्त्री कमलबहादुर शाहलाई राजीनामा बुझाएका  छन् । 

दीगो वन व्यवस्थापन कार्यविधि मन्त्रीपरिषद्बाट पास गर्दै कार्यान्वयन गर्न ठूलो आर्थिक चलखेल गर्ने योजना बनाएको अडियो सार्वजनिक भएपछि उनले राजीनामा दिनुपरेको हो । ‘अडियो सार्वजनिक भएपछि मैले नैतिकताको आधारमा राजीनामा दिन्छु,’ उनले भने । मन्त्री चौधरीले पदबाट राजीनामा दिएको बताउँदै सत्यतथ्य छानबिनका लागि बाटो खुला गरिदिएको बताए । 

उक्त अडियो सार्वजनिक भएपछि मुख्यमन्त्री शाहले पनि पदबाट राजीनामा दिन निर्देशन दिएका थिए । मन्त्री चौधरीका अनुसार उक्त अडियो भदौ महिनाको हो । ‘म भर्खर मन्त्री भएको समयमा केही व्यक्ति भेट्न आएका थिए,’ उनले भने, ‘अडियोमा भएका कुराकानी चिया गफ भइरहेको समयमा हुन् । त्यो समयमा मलाई केही पनि जानकारी थिएन । मेरो इच्छा नहुँदा नहुँदै उनीहरुले कुराकानी गरेका हुन् ।’

अडियोमा मन्त्री चौधरीसंगै सचिवालयका कर्मचारी र केही काठ व्यवसायीको आवाज सुन्न सकिन्छ । उनीहरुबीच दिगो वन व्यवस्थापन कार्यविधि निर्माणका लागि आर्थिक चलखेलका विषयमा कुराकानी भएको छ । अडियोमा मन्त्री चौधरीदेखि मुख्यमन्त्री र नागरिक उन्मुक्तिका केन्द्रीय नेतालाई समेत यो कार्यविधि पास गर्न आर्थिक हिस्सा दिनुपर्ने उल्लेख छ । चौधरी नागरिक उन्मुक्ति पार्टीका प्रदेशसभा सदस्य हुन् ।