धरान । धरान उपमहानगरपालिकाको भेडेटार जाने बाटोमा प्रहरी र तस्करबीच गोली हानाहान भएको छ । मंगलबार साँझ सरकारी नम्बर प्लेटको स्कर्पियोमा मोटरसाइकलले स्कर्टिङ गर्दै धनकुटातर्फबाट गाँजा तस्करी गर्दै गर्दा तस्करसँग प्रहरीको मुठभेड भएको हो ।

प्रहरीले सो क्रममा करिब ११ राउन्ड फायर गरेको थियो । घटनास्थल नजिक रहेका प्रत्यक्षदर्शीका अनुसार दुवै तर्फबाट गोली चलेको आवाज आएको थियो ।

कोशी प्रदेश प्रहरी कार्यालयका एसएसपी भीम दाहालका अनुसार करिब ६ सय केजी गाँजा बरामद भएको छ । यसबारे थप अनुसन्धान भइरहेको उनले बताए ।