धनगढी । कैलालीमा लागुऔषधसहित पाँच जना पक्राउ परेका छन् । साढे पाँच किलो बढी चरेस र झण्डै पाँच ग्राम खैरो हेरोइनसहित पाँच जनालाई पक्राउ गरिएको हो । 

जिल्ला प्रहरी कार्यालय कैलालीका सहप्रवक्ता प्रहरी निरीक्षक लोकराज जोशीका अनुसार धनगढी उपमहानगरपालिका– २ त्रिनगरबाट डोटीको शिखर नगरपालिका– ८ का ३५ वर्षीय बीरबहादुर रावललाई पक्राउ गरिएको छ ।  उनको साथबाट २ ग्राम ७६०  मिलिग्राम खैरो हेरोइन बरामद गरिएको छ । लागुऔषध ब्युरो शाखा धनगढी, वडा प्रहरी कार्यालय धनगढी र प्रहरी चौकी त्रिनगरबाट खटिगएको संयुक्त प्रहरी टोलीले रावललाई पक्राउ गरेको हो । 

यस्तै चुरे गाउँपालिका– ३ बस्ने  ३२ वर्षीय मोहन मल्ललाई पनि पक्राउ गरिएको छ । उनको साथबाट ५९० मिलिग्राम खैरो हेरोइन बरामद भएको प्रहरी निरीक्षक जोशीले बताए । 

धनगढी उपमहानगरपालिका– २ मिलन चोकस्थित जयराम होटल एण्ड लज रेष्टुरेन्टका सञ्चालक ३२ वर्षीय राम बोहरा पनि पक्राउ परेका छन् । उनको होटलबाट पाँच किलो ६९० ग्राम चरेस बरामद गरिएको छ । धनगढी उपमहानगरपालिका–१२ जुगेडाबाट २३ वर्षीय विजय बिक र धनगढी– ७ का २२ वर्षीय प्रदीप राना पक्राउ परेका छन् । उनीहरुको साथबाट ७४० मिलिग्राम खैरो हेरोइन बरामद भएको सहप्रवक्ता जोशीले जानकारी दिए ।