धनगढी । सुदूरपश्चिम प्रदेशमा तरकारी उत्पादन घटेको छ । 
आर्थिक वर्ष २०८०/८१ को तुलनामा २०८१/८२ मा झण्डै १८ प्रतिशतले तरकारी उत्पादन घटेको हो । तरकारी खेती गरिएको जमीनको क्षेत्रफल घट्नुका साथै मौषमको कारणले उत्पादकत्व समेत घट्न भई उत्पादनमा ह्रास आएको छ ।

प्रदेश कृषि विकास निर्देनालयको तथ्यांक अनुसार २०८१/८२ मा तीन हजार ७३२ हेक्टर तरकारी खेती गरिएको क्षेत्रफल घटेको थियो भने ५७ हजार १३५ टनले तरकारी उत्पादन घटेको छ । २०८१/८२ मा २० हजार ६२३ हेक्टर जमीनमा तरकारी खेती गरी दुई लाख ६४ हजार ७१३ टन तरकारी उत्पादन भएको निर्शेनालयले जनाएको छ । यो वर्ष तरकारीको उत्पादकत्व १२.८४ टन प्रति हेक्टर रह्यो ।

२०८०/८१ मा २४ हजार ३५५ हेक्टर जमीनमा तरकारी खेती गरिएकोमा तीन लाख २१ हजार ८४८ टन उत्पादन भएको थियो । यो वर्ष उत्पादकत्व सबै वर्षभन्दा बढी १३.२१ टन प्रति हेक्टर थियो ।

यसअघि २०७९/८० मा २२ हजार आठ हेक्टरमा तरकारी खेती गरिदा दुई लाख ८९ हजार ४०३ टन तरकारी उत्पादन भएको थियो । यो वर्ष उत्पादकत्व १३.१५ प्रति हेक्टर रह्यो । हालसम्मको सबैभन्दा बढी तरकारी उत्पादन भएको वर्ष २०७८/७९ थियो । यो वर्ष २६ हजार १९९ हेक्टरमा तरकारी खेती गरिदा तीन लाख २९ हजार ४१२ टन उत्पादन भई उत्पादकत्व १२.५७ टन प्रति हेक्टर रह्यो ।

निर्देशनालयका अनुसार २०७८/७९ मा कोभिडको कारण मानिसहरु घर फर्केपछि तरकारी खेतीमा लागेका थिए । कोभिडको प्रभाव कम भएसंगै किसानहरु पुनः विदेशिन थालेपछि तरकारी खेतीको क्षेत्र पनि घटेको छ भने मौषमको कारणले उत्पादकत्वमा समेत प्रभाव परिरहेको छ ।