धनगढी । कैलाली जिल्लाको प्रसिद्ध धार्मिक पर्यटकीय स्थल बेहडा बाबा जाने बाटोमा पर्ने शिवगंगा नदीमा पुल बनाउन ठेक्का लगाएको आठ वर्ष भएको छ । सडक डिभिजन कार्यालय महेन्द्रनगरबाट २०७४ साल असार ३ गते धनगढी–१७, पथरीमा पर्ने सो पुल बनाउन ठेक्का पप्पु एड्भेन्चर जेभीले यो आठ वर्षमा पुलको फाउण्डेसनसमेत बनाएको छैन । 

तीन वर्षमा काम सक्ने गरी १४ करोड २६ लाख रुपैयाँमा ठेक्का कबोल गरेको जेभीले मोभिलाइजेशन रकम लिएर आर्थिक वर्ष २०७४÷०७५ सालमा काम शुरु गरेको थियो ।
तर, पुलको डिजाइनभन्दा फरक स्पानहरु बनेपछि सडक डिभिजन कार्यालय महेन्द्रनगरले तत्काल काम रोकेर भेरिफिकेशन गराउन जेभीलाई पत्र पठाएको थियो । 

जेभीमा कामको जिम्मेवारी लिएको एड्भेन्चरले पत्रमा गरिएको निर्देशनअनुसार काम त रोक्यो तर भेरिफिकेशन गराएन । त्यसपछि डिभिजन कार्यालयले पटकपटक पत्र काटेर भेरिफिकेशन गराएर काम गर्न पत्र पठायो । एड्भेन्चरले भने भेरिफिकेशन गराउनभन्दा डिभिजन कार्यालयबाट भुक्तानी लिनमात्रै ध्यान दियो । जसको परिणाम हालसम्म स्पानका फाउण्डेसनहरु भेरिफिकेशन भइसकेको छैन । 

शिवगंगामा पुल बनाउने योजना अलपत्र छ । तर जेभीले ठेक्काको २२ प्रतिशत रकम (तीन कारोड १३ लाख ७२ हजार रुपैयाँं) शुरुमै भुक्तानी लिइसकेको छ । पुलको पोलका लागि खनिएका खाल्डा र फाउण्डेसन राख्न गरिएको ढलान बालुवाले पुरेको छ । डिजाइनअनुसार स्पानको फाउण्डेसन नबनाएको एड्भेन्चरले यही कात्तिक महिनाको मध्यबाट बालुवाले पुरिएका फाउण्डेसनको ढलान निकाल्ने काम गरिरहेको डिभिजन कार्यालयका प्रमुख राजेशकुमार यादवले बताए । 

‘उहाँहरुले पुरिएको फाउण्डेसन निकाली सकेपछि ल्यावमा गुणस्तर परीक्षण हुन्छ,’ उनले भने, ‘ल्याबको प्रतिवेदनअनुसार काम अगाडि बढ्छ । अहिले उहाँहरु काम गर्ने भनेर सम्पर्कमा आउनु भएको छ । पुल निर्माणको काम हुन्छ । एड्भेन्चरले यो काम गर्नै पर्छ । एड्भेन्चरले नगरे जेभीमा रहेको अर्को कन्ट्रयाक्टरले भए पनि काम गर्नै पर्छ ।’
सोही वर्ष सडक डिभिजन कार्यालय महेन्द्रनगरले सोही सडकमा पर्ने खुटिया नदीमा समेत पुल बनाउने ठेक्का लगाएको थियो । खुटिया नदीमा पनि तीन वर्षमै पुल निर्माण गरिसक्ने गरी ठेक्का लागेको थियो । खुटियामा चार वर्ष लगाएर पुल निर्माण भइसकेको पनि चार वर्ष भइसकेको छ ।

सडक डिविजन कार्यालय महेन्द्रनगरका सूचना अधिकार इञ्जिनियर हरिसप्रसाद जोशीले सडक निर्माणका लागि बजेटलगायत सबै व्यवस्था भए पनि निर्माण कम्पनीको लापरबाहीले काम नभएको बताए । 

धनगढी उपमहानगर वडा नम्बर १७ का वडाध्यक्ष माधवराज रानाले पनि निर्माण कम्पनी र सरकारी कार्यालयको कमजोरीले गर्दा पुल निर्माणको योजना अलपत्र परेको बताए । उनले संगै ठेक्का लगाएको खुटिया पुल बनिसक्दा पनि शिवगंगामा कामनै शुरु नगर्ने निर्माण कम्पनीलाई कारबाही गर्नुपर्नेमा ठेक्का लगाउने सरकारी कार्यालयले काम गर्न नसकेको बताए । 

पुल नहुँदा स्थानीयलाई सास्ती
शिवगंगा पुलले धनगढीको वडा नम्बर १७ को पथरी र धुरझन्ना गाउँलाई धनगढी वडा नम्बर १५ को रामपुर र प्रसिद्धा धार्मिक पर्यटकीय स्थल बेहडा बाबालाई जोड्छ । पुल नबनेको कारण स्थानीय बासिन्दाको दैनिक जीवन कठीन हुनुका साथै बर्खामा निकै जोखिमपूर्ण यात्रा गर्नु परेको वडाध्यक्ष रानाले बताए । ‘पुल नहुँदा दिनहुँ आउजाउ गर्न असहज छ,’ उनले भने, ‘बर्खाको बेला डन्लपमा राखेर नदी तार्नुपर्ने बाध्यता हुन्छ । डन्लपमा नदी तार्दा नागरिकले महंगो शुल्क तिर्नुपर्छ । त्यसरी तर्दा जोखिम पनि हुन्छ ।’ 

हिउँदमा वडा कार्यालयले काठे साँघु हालीदिए पनि हरेक वर्ष बर्खाले बगाइदिने गरेको छ । हरेक वर्ष हिउँदमा काठे साँघु हाल्न परेको वडाध्यक्ष रानाले बताए । मानिस, मोटरसाइकल र अटोरिक्सा काठे साँघुबाट हिँड्ने व्यवस्था भए भए पनि र गाडीहरु पानीबाटै वारपार गराउनुपर्ने बाध्यता रहेको वडा सदस्य रामबहादुर चौधरीले बताए । उनले जंगलमा दिनहुँ भेडाबाख्रा, गाईभैंसी चराउन जान पनि कठीन रहेको बताए । 

धनगढीको क्याम्पस गेट, जोखर तालदेखि पथरी, बेहडा बाबा, रामपुर हुँदै चौमालासम्मको सो सडक नेपाल सरकारको प्राथमिकता प्राप्त धार्मिक र कृषि सडक हो । पुल नबनेकै कारण सो सडक कालोपत्रे गर्ने योजनामा समेत बाधा पुगेको वडाध्यक्ष रानाले बताए । उनले धनगढीदेखि पथरीसम्म सो सडक कालोपत्रे भइसकेको बताए ।