धनगढी । 
०००
भदौ १३ गते कैलालीको गौरीगंगा नगरपालिकाका कमल सावदको मोटरसाइकल चोरी भयो । धनगढी उपमहानगरपालिका–४ स्थित दिनेश सञ्चारगृहको कार्यालयबाट सुदूरपश्चिम प्रदेश ०१–०१० प ५६२० नम्बरको २२० सिसीको बजाज कम्पनीको मोटरसाइकल चोरी भएको थियो । ‘मैले मोटरसाइकल खरिद गरेर नामसारी गरेकै दिन मोटरसाइकल चोरी भएको थियो,’ सावदले भने, ‘मोटरसाइकल चोरी भएको चार महिना पुग्दासमेत फेला परेको छैन । प्रहरीले बेवास्ता गर्दा चोरी भएको मोटरसाइकल फेला नपरेको हो ।’ 

पत्रकारसमेत रहेका सावदले मोटरसाइकल चोरी कसले र कसरी गरिएको हो भनेर आफैँ पत्ता लगाएर प्रहरीलाई जानकारीसमेत दिएका थिए । तर, प्रहरीले आरोपितलाई सोधपुछसम्म गरेन । ‘प्रहरीले मोटरसाइकल खोज्न लापरबाही गरेको हो,’ उनी भन्छन्, ‘सुरुमा मुद्धा दर्ता पनि गरिएन । जिल्ला प्रहरी कार्यालय कैलालीमा आफैँ हाजिर भएका आरोपितलाई पनि भगाइदिएको थियो । बेवास्ता गरेपछि जिल्ला प्रहरीमा म धर्नामा बसेको थिए । अहिले आरोपित पक्राउ परेका छन् ।’

प्रहरीले मोटरसाइकल चोरीमा संलग्न रहेको आरोपमा कञ्चनपुरको पुर्नवास नगरपालिका–१० विकासबस्तीका किशन राना पक्राउ गरेको हो । 

०००
असोज १४ गते राति धनगढी उपमहानगरपालिका–६ मटियारीबाट रन्जित रानाको मोटरसाइकल चोरी भयो । घरको बरण्डामा राखेको से ७ प ७६३३ नम्बरको रातो कलरको एनएस दुई सय सिसीको मोटरसाइकल चोरी भएको थियो ।

‘मोटरसाइकल चोरी भएको तीन महिना बितिसकेको छ,’ रानाले भने, ‘चोरी भएकै दोस्रो दिन प्रहरीमा निवेदन दिएको थिए । अहिलेसम्म फेला परेको छैन । प्रहरीलाई के भइरहेको छ भन्दा भगवान भरोसा भन्नुहुन्छ ।’

०००
मंसिर पहिलो साता कैलाली भन्सार कार्यालयका प्रमुख भन्सार अधिकृतका भान्सेसहित दुई जना पक्राउ परे । भन्सारका ३४ वर्षीय भान्से रोहित मेहता र ग्यारेज सञ्चालन गर्दै आएका २५ वर्षीय प्रकाशप्रसाद उपाध्यायलाई प्रहरीले पक्राउ गरेको थियो ।

एकै अल्फाबेट र नम्बर भएका दुई मोटरसाइकल चलाएको निवेदन परेपछि दुबै जनालाई पक्राउ गरिएको थियो । सु.प.प्र ०२–००४ प ४१४८ नम्बरका दुई मोटरसाइकल फेला परेका थिए । जिल्ला प्रहरी कार्यालय कैलालीका प्रहरी उपरीक्षक पदमबहादुर बिष्टका अनुसार अहिले दुबै मोटरसाइकल चोरीका रहेको पुष्टि भएको छ । ‘हामीले अनुसन्धान गर्दा दुबै मोटरसाइकल चोरीका रहेको खुलेको हो,’ उनले भने । 

०००
कैलालीबाट पछिल्लो समय दिनदहाडै मोटरसाइकल चोरी हुन थालेका छन् । तर, प्रहरीले न चोरीमा संलग्नलाई पक्राउ गर्न सकेको छ न त अधिकाशं मोटरसाइकल नै फेला परेका छन् । जिल्ला प्रहरी कार्यालय कैलालीका सहप्रवक्ता प्रहरी निरीक्षक दर्शन खड्का अनुसार चालू आर्थिक वर्षको पाँच महिनामा जिल्लामा नौं वटा मोटरसाइकल चोरी भएका मुद्वा दर्ता भएका छन् ।

नौंमध्ये अहिलेसम्म तीन वटा मोटरसाइकल फेला परेको प्रहरी निरीक्षक खड्काले बताए । यस्तै गत आर्थिक वर्षमा कैलालीमा ३९ वटा मोटरसाइकल चोरी भएका थिए । तीमध्ये नौं वटा मात्रै फेला परेको प्रहरी निरीक्षक खड्काले जानकारी दिए । 

भन्सारका कर्मचारी र प्रहरीको मिलेमतोमा मोटरसाइकल चोरी हुँदा फेला पर्न मुस्किल हुने गरेको आरोप पनि लाग्दै आएको छ । ‘कैलालीबाट चोरी भएका मोटरसाइकल के भारत पुग्छन् के नम्बर परिवर्तन गरेर चलाउने गरिएको छ,’ भन्सारकै एक कर्मचारीले भने, ‘यी दुबै कार्यमा भन्सारकर्मी र प्रहरीको मिलेमतो हुन्छ ।’ यता जिल्ला प्रहरी कार्यालय कैलालीका एसपी बिष्ट भने कसैको मिलेमतोबारे आफूँलाई जानकारी नभएको बताउँछन् ।

उनका अनुसार चोरीका अधिकांश मोटरसाइकल भारत पुग्ने हुँदा फेला पर्न मुस्किल हुने गरेको छ । ‘मोटरसाइकल चोरी गरेर संलग्न व्यक्तिले भारत पुगाउने गरेका छन्,’ उनले भने, ‘त्यहाँ गएर मोटरसाइकलका पाठपुर्जा बिक्री गर्ने गरेका छन् । केही मोटरसाइकल पहाडी जिल्लामा पनि पुग्ने जानकारी हामीले पाएका छौं ।’