दार्चुला । दार्चुलाको एक विद्यालय व्यवस्थापन समितिको अध्यक्ष बन्नका लागि १६ जनाले उम्मेदवारी दिएका छन् । 

जिल्लाको शैल्यशिखर नगरपालिका–९ गोकुलेश्वरमा रहेको गोकुलेश्वर माविको व्यवस्थापन समिति अध्यक्षमा १६ जनाको उम्मेदवारी परेको हो । 

अभिभावक भेलाले अध्यक्षमा सहमति गर्न नसकेपछि मनोनयनको नामावली शैल्यशिखर नगरपालिकामा पठाउने निर्णय गरिएको छ । 

गोकुलेश्वर माविको विद्यालय व्यवस्थापन समिति अध्यक्षका लागि मनोनयन गराउनेहरूमा विशेश्वरप्रसाद विष्ट, भानबहादुर विष्ट, ईश्वरदत्त पाण्डेय, कालुबहादुर चन्द, किशौरराज विष्ट, कोमलराज विष्ट, लक्ष्मीप्रसाद जोशी, महेशराज विष्ट, महेशसिंह भण्डारी, प्रेमबल्लभ जोशी, पूर्णबहादुर विष्ट, रणबहादुर खत्री, रमेशचन्द्र भट्ट, उत्तरसिंह विष्ट, जगदीशबहादुर चन्द र उत्तरसिंह विष्ट रहेका छन् ।

शैल्यशिखर नगरपालिकाको शिक्षा नियमावली २०७४ को सातौं संशोधनअनुसार विद्यालय व्यवस्थापन समिति गठनमा सहमति नभएपछि उम्मेदवारहरूमध्ये अध्यक्ष नगरपालिकाले मनोनीत गर्ने व्यवस्था रहेको छ ।