धनगढी । बाजुरामा रुखले च्यापिएर घाइते भएका दुई जनाको हेलिकोप्टरमार्फत उद्वार गरिएको छ । जिल्लाको हिमाली गाउँपालिका–३ बिच्छ्यास्थित युनामा रुखले च्यापिएर घाइते भएका ४८ वर्षीय सिदुपुरी रोकाया र ३० वर्षीय पर्मलाल सुनारको हेलिकोप्टरमार्फत उद्वार गरिएको हो ।

घाइते दुबै जनाको हिजो राति स्वास्थ्यकर्मीको टोलीले घरमै उपचार गरेको र आज बिहान थप उपचारका लागि सुर्खेत पठाइएको प्रहरीले जनाएको छ । 

रुखले च्यापिएर ४३ वर्षीय सुपधन बुढाको घटनास्थलमै मृत्यु भएको थियो । हिमाली गाउँपालिकाका अध्यक्ष गोबिन्दबहादुर मल्लका अनुसार स्थानीय नापीखोला साना जलविद्युत आयोजनामार्फत गाउँगाउँमा विद्युत पुगाउने कार्य कादुरी संस्थाले गरिरहेको छ ।

‘विद्युतिकरणका क्रममा सल्लाका रुख कटानको कार्य भइरहेको थियो,’ अध्यक्ष मल्लले भने, ‘सोही क्रममा रुख ढल्दा च्यापिएर घटना घटेको हो ।’