धनगढी । वृत्ति विकासको माग राख्दै आन्दोलनमा उत्रिएका सुदूरपश्चिमका लेखा अधिकृतहरुले आन्दोलनका कार्यक्रम फिर्ता लिएका छन् । प्रदेश सरकार माग सम्बोधनका लागि सकारात्मक देखिएको भन्दै उनीहरुले आन्दोलनका सबै कार्यक्रम फिर्ता लिएर काममा फर्किएकाे बताएका हुन् ।

‘सुदूरपश्चिम प्रदेशमा कार्यरत लेखा समूहका कर्मचारीहरुले वृत्ति विकासको माग राख्दै विभिन्न चरणमा आन्दोलन गर्दै आइरहेको थियौं,’ प्रदेश लेखा नियन्त्रक कार्यालयका लेखा अधिकृत बलदेव कापडीले भने, ‘फागुन २० गते प्रदेश लोकसेवा आयोगले प्रकाशन गरेको विज्ञापनपछि धर्ना कार्यक्रम तथा भुक्तानी निकासा रोक्का कार्यक्रम गरिरहेका थियौं । अहिले प्रदेश सरकार हाम्रो माग सम्बोधन गर्न सकारात्मक देखिएपछि आन्दोलनका सबै कार्यक्रम स्थगित गरेका छौं ।’

लेखा अधिकृतहरु भुक्तानी रोक्कासंगै कर्मचारीदेखि मुख्यमन्त्रीसम्मको तलब रोक्का गर्दै आन्दोलनमा उत्रिएका थिए । उनीहरु आन्दोलित भएपछि आर्थिक मामिला मन्त्रालयका सचिव झलकराम अधिकारीको संयोजकत्वमा संगठन तथा व्यवस्थापन सर्वेक्षण समिति गठन गरिएको थियो । उक्त समितिले लेखा समूहको संगठन तथा व्यवस्थापन सर्वेक्षण गर्ने कार्य सुरु गरिसकेको लेखा अधिकृत कापडीले बताए । 

बुधबार मुख्यमन्त्री कमलबहादुर शाह र प्रदेश लोकसेवा आयोगका अध्यक्ष यज्ञराज बोहराको उपस्थितिमा भएको छलफलमा लेखा समूहका कर्मचारीहरुको वृत्ति विकासको सुनिश्चितता हुने गरी प्रकृया अगाडि बढाउन प्रमुख सचिव र प्रदेश लोकसेवा आयोगका सचिवलाई निर्देशन दिइएको बताइएको छ । 

लेखा समूहका अधिकृतहरूले मुख्य तीन माग राखेर आन्दोलन सुरु गरेका थिए । प्रदेश निजामती सेवाको नवौँ तहमा प्रशासन सेवाका समूह हटाउनुपर्ने माग राखिएको थियो । यस्तै, लेखा समूहको ओ एन्ड एम गर्नुपर्ने, प्रदेश लोक सेवा आयोगले २० फागुन २०८१ मा खोलेको प्रशासन सेवाको विज्ञापन स्थगित गर्नुपर्ने र पुनः पछि एकमुस्ट विज्ञापन गर्नुपर्ने माग राखिएको थियो । माग सम्बोधन गर्न सक्ने अवस्था नरहे संघमा फिर्ता पठाइदिन लेखा अधिकृतहरूले आग्रह गरेका थिए ।