धनगढी । गर्मी सुरु भएसँगै कर्णाली नदीमा जलयात्राको सिजन पनि सुरु भएको छ । कर्णाली नदीमा चल्ने र्याफ्ट र स्टिमरमा जल सयर गर्न दैनिक सयौं आन्तरिक पर्यटक चिसापानी र टीकापुर पार्क पुग्न थालेका छन् ।
चिसापानीबाट कर्णालीमा र्याफ्ट चलाइरहेको सत्ति कर्णाली र्यापिड एड्भेन्चर प्रालिका सञ्चालक बिष्णुप्रसाद जैशीका अनुसार दिनहुँ सयौं मानिसहरु र्याफ्टमा सयर गर्न पुग्ने गरेका छन् । उनले बिदाको दिन हजारौंका संख्यामा चिसापानीमा आन्तरिक पर्यटक आउने गरेको बताए ।
र्याफ्टिङ गरेवाफत् प्रति व्यक्ति दुई सय रुपैयाँ लिने गरेको सञ्चालक जैशीले बताए । उनले विदा बाहेकको दिन दैनिक ५ देखि १० हजार रुपैयाँको टिकट विक्री हुने गरेको बताउँदै होलीको दोस्रो दिन शनिबार परेकोले बिदा मनाउन हजारौंको संख्यामा मानिसहरु आएको बताए । उनले सो दिन २८ हजार रुपैयाँको टिकट विक्री भएको बताए ।
र्यापिड एड्भेन्चरले कर्णालीमा १० वटा र्याफ्ट राखेको छ । ‘१० वटै र्याफ्ट एकै पटक नदीमा चल्दैन,’ सञ्चालक जैशीले भने, ‘आवश्यकता अनुसार हामीले नदीमा ल्याउँदै जान्छौं । बिदाको दिन नदीमा राफ्टको संख्या बढाउँछौं । अरु दिनमा तीन वटा राफ्ट नदीमा हुन्छ । एक राफ्टमा एक पटकमा १० जनालाई सयर गराउँछौं ।’
उनका अनुसार र्याफ्टमा सयर गर्न बुकिङ सुविधा पनि राखिएको छ । चिसापानीदेखि टीकापुर पार्कसम्मको यात्राका लागि एउटा र्याफ्टको १५ हजार रुपैयाँमा बुक गर्न सकिने सञ्चालक जैशीले बताए । उनले र्याफ्टबाट टीकापुर पार्कमा उत्रिसकेपछि त्यहाँबाट चिसापानीसम्म फर्किन कम्पनीले नै गाडी व्यवस्था गर्ने बताए । चिसापानीबाट टीकापुर पार्कसम्म तीन घण्टामा पुग्न सकिने बताउँदै सो रुटमा जलयात्राका क्रममा बर्दिया राष्ट्रिय निकञ्जका जनावर, जलपञ्छी, सोना जातिले बालुवामा सुन खोजेको लगायत दृष्य हेर्न पाइने बताए ।
तर, दुई सय रुपैयाँको टिकट लिएर र्याफ्टिङ गर्ने जलयात्रीलाई चिसापानी पुलको लतमाथिको गराउने गरेको छ । कतिपया र्यफ्टहरु विभिन्न ठाउँमा कार्यक्रमका लागि समेत बुकिङमा जाने गरेको बताउँदै उनले नियमित रुपमा ६ जना रिभर गाइड काम रहेको बताए । उनले कम्पनीसँग ४० जना रिभर गाइडहरु पटके रुपमा काम गरिरहेको बताए ।
यसैगरी, टीकापुर पार्कमा स्काई वड एड्चेन्चर स्पोर्ट्स प्रालिले टीकापुर पार्क क्षेत्रबाट कर्णाली नदीमा मोटर स्टिमर चलाएको छ । टीकापुर पार्क घुम्न आउने मानिसहरुलाई जलयात्रा गराउने उद्देश्यका साथ स्काई वडले तीन महिनादेखि सो क्षेत्रमा मोटर स्टिमर सञ्चालन गरिरहेको छ । स्काई वडका योगेश शाहले बिदाको दिनमा पार्क घुम्न आउनेले मोटर स्टिमर चढेर जलयात्रा गर्ने गरेको बताए । प्रति व्यक्ति २५० रुपैयाँ टिकट निर्धारण गरिएको बताउँदै उनले विद्यार्थीलाई दुई सय रुपैयाँमा लगाइएको बताए ।
कर्णाली नदीमा जलयात्रा र बीच मार्केटको सम्भावना भएपनि तीनै तहका सरकारले कर्णाली नदीमा उक्त कार्यका लागि पुर्वाधार निर्माण गर्नुका साथै नीति र ऐन कानुन नबनाउँदै कर्णालीमा बगिरहेको पानीबाट राज्यले लाभ लिन सकेको छैन । कर्णालीमा जलयात्राका साथै बिच मार्केट व्यवस्था गरेर आन्तरिक पर्यटक र बाह्य पर्यटक ल्याउन सकिने भएपनि सरकारहरुले ध्यान दिएका छैनन् । कर्णाली नदीको तराइँ क्षेत्रमा जलयात्रा तथा पहाडी क्षेत्रमा सहासिक जलयात्राका लागि पुर्वाधार बनाउन सकिए कर्णालीको पर्यटन प्रबर्ध्दन गर्न सहज हुने सञ्चालक जैसीले बताए ।
हुम्लादेखि सुरु हुने कर्णाली नदी टीकापुर पार्कसम्मको करिब १८० किमि लामो छ । सो भागमा र्याफ्टिङ र केही भागमा सहजरुपमा मोटर बोटसमेत सञ्चालन गर्न सकिने उनले बताए । कर्णाली नदीको जलयात्राप्रति बाह्य र आन्तरिक पर्यटकको अभिरुची बढाउन सकेमा यस क्षेत्रले पर्यटनबाट ठूलो लाभ लिन सक्छ । पर्यटकलाई कर्णालीको जलयात्रामा आउन नदीमाथि बनेको एसियाकै नमुना ह्याङ्गिङ ब्रिज चिसापानी पुलले थप मद्दत पु¥याइरहेको छ । चिसापानी पुलमा फोटो खिच्ने, टीकटक, रिल बनाउने मानिसहरुको दिनहुँ भिड लाग्ने गरेको छ ।
प्रतिक्रिया