धनगढी । कैलालीको धनगढीमा केन्द्रीय कार्यालय रहेको नवजीवन सहकारीले नवजीवन खाद्य उद्योगको स्थापना गर्दै शनिबारदेखि चामल बिक्री सुरु गरेको छ । कैलालीको गोदावरी नगरपालिका-८ स्थित मजगाउँमा नवजीवन सहकारी संस्था लिमिटेडले सुरु गरेको नवजीवन खाद्य उद्योगले आजदेखि चामल बिक्री सुरु गरेको हो ।

उद्योगले १६ हजार २८ क्विन्टल धान खरिद गर्दै एक हजार १८४ क्विन्टल धान कुटाइ गरिसकेको छ । जसबाट ६२९ क्विन्टल चामल उत्पादन भएको छ । खाद्य उद्योग स्थलमा आज आयोजित पत्रकार सम्मेलनमा बोल्दै संस्थाका अध्यक्ष देवबहादुर बमले मोटो र मसिनो गरी दुई किसिमको चामल उत्पादन भइरहेको बताए ।

२५ किलोको मोटो चामलको कट्टाको १४ सय र मसिनो चामलको २२ सय दर तोकिएको उनले बताए । धानको मूल्यअनुसार चामलको दर तलमाथि हुनसक्ने उनले बताए । उनका अनुसार पहिलो चरणमा नवजीवन सहकारी संस्थाका १० वटै सेवा केन्द्रहरुबाट बिक्री गरिने छ ।

आगामी दिनमा पिठो र तेल उत्पादनका साथै पानी फ्याक्ट्री सञ्चालनको योजना अघि बढाएको उनले बताए ।

२०५० सालमा स्थापना भएको नवजीवन सहकारी संस्था हाल सुदूरपश्चिम तथा लुम्बिनी प्रदेशमा १० शाखासहित सञ्चालनमा छ ।