आवास ओगटिने भएकोले अस्पताललाई भोगाधिकार नदिइएको हो : इञ्जिनियर रावल
भोगाधिकार नपाएको हुँदा चिकित्सकको आवासका लागि घर भाडामा लिनुपरेको हो : कार्की

धनगढी । कैलालीको गेटामा ४२ वटा भवनको निर्माण सम्पन्न भएको वर्षाै भयो । साढे छ अर्ब बढीको लागतमा छ सय शय्याको अस्पताल र चिकित्सा शिक्षा अध्यापनका लागि आलिसान भवन ठडिएका छन् । 

तर, अहिलेसम्म लक्ष्यअनुसार न अस्पताल सञ्चालन भएको छ न त मेडिकल शिक्षाको अध्यापन नै सुरु हुन सकेको छ । उल्टै ती अजिङका भवन जीर्ण बन्न थालेका छन् । कतिपय भवन चर्किनुको साथै रङ खुइलिन थालेको छ । कतिपय ठाउँमा पानी चुहिएर ढुसी परेको छ । हावाहुरीले झ्यालढोकामा क्षति पुगेको छ । भवनमा जताततै माकुराको जालो भरिएको छ । झारपात र बुट्यानले कतिपय भवन नै छोपिएका छन् । आँगनमा लगाइएका ब्लक पनि बुट्यान र घाँसपातले छोपिएका छन् । 

ती भवन प्रयोगविहीन भएको अवस्थामा गत वर्षदेखि सुरु भएको ५० शय्याको गेटा अस्पतालका चिकित्सकका लागि भने भाडाको निजी घर व्यवस्था गरिएको छ । उनीहरुको आवासका लागि अस्पतालले मासिक सवा एक लाख रुपैयाँ भुक्तानी गरी तीन वटा भवन भाडामा लिएको छ । अस्पताल परिसरमै अर्बौं रकम खर्चेर सुविधा सम्पन्न फ्यामिली अपार्टमेन्ट रहेको १२ वटा भवनमा बनाइएका छन् । शिक्षा मन्त्रालयले आवासका लागि बनाइएका भवनहरु अस्पताललाई भोगाधिकार नदिएको हुँदा अस्पतालले मासिक एक लाख २७ हजार रुपैयाँ भुक्तानी गर्ने गरी एउटा घर गेटामै र दुई घर धनगढीमा भाडामा लिएको अस्पतालका सूचना अधिकारी नैनसिंह कार्कीले बताए ।

अस्पतालका निर्देशक र केही डाक्टर धनगढीमा भाडा लिएको घरमा बस्दै आएका छन् भने केही मेडिकल अफिसर र कर्मचारी गेटामा भाडा लिइएको घरमा बस्दै आएका छन् । सूचना अधिकारी कार्कीले १५ जनाको लागि भाडामा घर लिएको बताए । उनले केही नर्सिङ स्टाफ र तीन जना मेडिकल अफिसर अस्पतालकै कुरुवा घरमा एक–एक कोठा लिएर बस्दै आएको बताए ।

आवासका लागि मात्रै १२ वटा भवनमध्ये अस्पतालले एउटा कुरुवाको आवासको मात्रै भोगाधिकार पाएको छ । अस्पताल सञ्चालनका लागि अन्य पाँच वटा भवन पनि गत वर्ष चैतमा भोगाधिकार पाएको कार्कीले बताए । १२ वटा भवन डाक्टर, प्रोफेसर, नर्सिङ स्टाफ लगायत स्वास्थ्यकर्मीहरुको परिवारसहित बस्न मिल्ने फ्ल्याटसहितको भवन तयार छ । गेटा मेडिकल कलेज पूर्वाधार निर्माण विकास समितिका इञ्जियर पवन रावलका अनुसार १६ फ्ल्याट प्रोफेसर, ३२ फ्ल्याट एसिस्टेन्ट एसोसियट प्रोफेसर, ३२ फ्ल्याट डाक्टर र बाँकी अन्य स्वास्थ्यकर्मीको लागि निर्माण भएको छ ।

नेपाल सरकारले गेटामा ०८० कात्तिक १ गतेदेखि ५० शय्याको अस्पताल सञ्चालन गरेको छ । अस्पताल सञ्चालनपछि पाँच वटा अस्पताल भवन र एउटा कुरुवा घर शिक्षा मन्त्रालयले अस्पताललाई भोगाधिकार दिएको छ । आवास भवनको भोगाधिकार प्राप्त नभएकोले डाक्टर र स्वास्थ्यकर्मीको लागि भाडामा घर लिन परेको सूचना अधिकारी कार्कीले बताए । उनले शिक्षा मन्त्रालय र स्वास्थ्य मन्त्रालयलाई बोधार्थ राखी पटकपटक भौतिक पूर्वाधार विकास निर्माण समितिलाई आवास भवनको भोगाधिकार दिन पत्राचार गरे पनि कुनै जवाफ नआएको बताए ।

तर, समितिका सदस्य सचिव तथा कैलाली जिल्ला शिक्षा समन्वय इकाईका प्रमुख इश्वरीप्रसाद ज्ञवालीले भोगाधिकार दिनका लागि स्पष्ट कानुनी व्यवस्था नभएको र गेटामा शहिद दशरथ चन्द स्वास्थ्य विज्ञान विश्वविद्यालयल सञ्चालन गर्न संसद्मा विधेयक विचाराधिन अवस्थामा रहेकोले अस्पताललाई भवन दिन नसकिएको बताए । उनले संसद्बाट सो विधेयक पारित भइसकेपछि उक्त संरचनामा शिक्षा मन्त्रालयअन्तर्गत नै शहिद दशरथ चन्द स्वास्थ्य विज्ञान विश्वविद्यालयल सञ्चालन हुने बताए ।

यता इन्जिनियर रावलले पनि अस्पतालले भवन माग गरी पत्र पठाए पनि स्पष्ट खाकासहित प्रस्ताव नगरेको बताए । उनले शिक्षा मन्त्रालयअन्तर्गत नै विश्वविद्यालय सञ्चालन गर्ने कानुनी आधार तयार भइरहेकोले तत्काल अस्पताललाई भवन दिँदा कनिष्ठ चिकित्सकले आवास ओगट्ने र पछि गएर प्रोफेसरहरुको लागि आवास व्यवस्थापनमा समस्या आउने भएकोले पनि समितिले अस्पताललाई भवन उपलब्ध गराउन नसकेको बताए । 

अस्पतालले अर्थो, गाइनोकोलोजी, सर्जरी, फिजिसियन, इएनटीको बहिरंग सेवा दिइरहेको छ । बहिरंग सेवा लिन आएका विरामीलाई भर्ना गरेर समेत उपचार सेवा दिइरहेको सूचना अधिकारी कार्कीले बताए । अस्पतालले डेढ वर्षदेखि सो सेवा दिइरहेको भए पनि गेटामा उपचार गराउन आउने विरामीको संख्या न्यून छ ।

गेटामा अस्पताल, कलेज, अडिटोरियम, चिकित्सक तथा प्रोफेसर आवास, छात्रावास, फोहोर व्यवस्थापन केन्द्र, खानेपानी, ढल निकास लगायतका भव्य संरचना निर्माण गरिएको छ ।