धनगढी । कैलालीको गेटा अस्पतालमा दूरबीन प्रविधिबाट पहिलोपटक सफल शल्यक्रिया भएको छ । धनगढी उपमहानगरपालिकाको फुलबारीका १८ वर्षीय दिनेश गिरीको दूरबीन प्रविधिबाट शल्यक्रिया गरिएको हो । 

गेटा अस्पतालका सूचना अधिकारी नैनसिंह कार्कीका अनुसार गिरीको घुँडाको एसिएल इन्जुरीको शल्यक्रिया गरिएको हो । अस्पतालका हाडजोर्नी रोग विशेषज्ञ डा. मोहन नाथ र मोहनचन्द्र जोशी तथा एनेस्थेसिया विशेषज्ञ डा. आशिष तिवारीको टिमले दूरबीन प्रविधिबाट शल्यक्रिया गरेको सूचना अधिकारी कार्कीले जानकारी दिए । 

सूचना अधिकारी कार्कीले एसिएल इन्जुरीको दूरबीन प्रविधिबाट सुदूरपश्चिममै पहिलोपटक शल्यक्रिया भएको दाबी गरे । 

गेटामा अहिले ५० शय्याको अस्पताल सञ्चालनमा छ । त्यहाँ स्वास्थ्य विज्ञान विश्वविद्यालय सञ्चालनका लागि भौतिक संरचनाको निर्माण सम्पन्न भइसकेको छ ।