धनगढी । सुदूरपश्चिममा चैत पहिलो साता पर्यटन महोत्सव लगाउने तयारी थियो । प्रदेश सरकारले पर्यटन महोत्सव सञ्चालनका लागि ४० लाख बजेट विनियोजन पनि गरेको छ । प्रदेश सरकारको सहयोगमा निजी क्षेत्रले महोत्सव गर्ने तयारी गरेका थिए । 

तर, २८ फागुनमा सुदूरपश्चिम प्रदेशसभाको अर्थ, विकास तथा प्राकृति स्रोत समितिले पर्यटन महोत्सवको सट्टा पर्यटन सप्ताह आयोजना गर्न निर्देशन दिएपछि कार्यक्रम अन्योलमा परेको छ । 

समितिको निर्देशनविपरीत महोत्सव आयोजना गर्न नसकिने र बजेटमा महोत्सव लेखिएको हुँदा सप्ताह सञ्चालन गर्न पनि नसकिने अवस्था सिर्जना भएको उद्योग, पर्यटन, वन तथा वातावरण मन्त्रालयमा मातहतको प्रदेश पर्यटन विकास कार्यक्रम कार्यान्वयन इकाइले जनाएको छ । ‘महोत्सव आयोजना लेखिएको हुँदा बजेट शीर्षक संशोधन गरेर सप्ताह आयोजना गर्न पनि समय अभाव छ,’ इकाई अधिकृत दानबहादुर थापाले भने, ‘संसदीय समितिको निर्देशन पनि काट्न मिल्दैन । यो कार्यक्रम कार्यान्वयन हुन्छ वा हुँदैन भन्ने अन्योल भएको छ ।’

समितिको निर्देशनपछि महोत्सवको तयारी रोकिएको थियो । मन्त्रालयले निजी क्षेत्रको सहकार्यमा चैत ४ देखि ६ गतेसम्म धनगढीमा पर्यटन महोत्सव आयोजना गर्ने तयारी गरिरहेको थियो । तयारी अन्तिम चरणमा पुगेको बेला समितिले निर्देशन दिएको थियो । निजी क्षेत्रले कार्यक्रममा सहभागीलाई निम्तो समेत पठाउनुका साथै महोत्सवका लागि थप स्रोत समेत जुटाएको थियो ।

समितिले सप्ताह आयोजना गर्दा पर्यटन क्षेत्रका विशिष्ट व्यक्ति र पर्यटन क्षेत्रमा काम गरिरहेका संस्थाहरुलाई समेत सहभागी गराउन निर्देशन दिएको थापाले बताए । समितिको निर्देशन अनुसार कार्यक्रम आयोजना गर्न बजेट अपुग हुने उनले जनाए ।