धनगढी । शनिबार सुदूरपश्चिम प्रदेशका उद्योग पर्यटन वन तथा वातावरणमन्त्री लक्ष्मणकिशोर चौधरीले पदबाट राजीनामा दिए । दीगो वन व्यवस्थापन कार्यविधि मन्त्रीपरिषद्बाट पास गर्दै कार्यान्वयन गर्न ठूलो आर्थिक चलखेल गर्ने योजना बनाएको अडियो सार्वजनिक भएपछि उनले राजीनामा दिएका थिए । 

उक्त अडियो सार्वजनिक भएपछि मुख्यमन्त्री कमलबहादुर शाहले मन्त्री चौधरीलाई पदबाट राजीनामा दिन निर्देशन दिएका थिए । उक्त अडियो प्रकरणपछि मुख्यमन्त्री शाहमाथि पनि प्रश्न उठ्न थालेको छ । 

आइतबार प्रतिपक्षी दल नेकपा माओवादी केन्द्र, एकीकृत समाजवादी र राप्रपाले प्रदेशसभा बैठकमा विरोध गर्दै मुख्यमन्त्री शाहको नैतिकतामाथि प्रश्न उठाएका छन् । ‘वनमन्त्रीज्यूले त नैतिकताका आधारमा राजीनामा दिनुभयो, उहाँलाई धन्यवाद छ,’ राप्रपाका प्रदेशसभा सदस्य खेमादेवी बिष्टले भनिन्, ‘मन्त्रीज्यूले मात्रै राजीनामा दिएर यो कुरा टुङगिन्छ होला त ? यसमा मुख्यमन्त्रीज्यू पनि जोडिनुभएको छ । मुख्यमन्त्रीको पार्टीलाई पनि मिलाउनपर्छ भन्ने कुरा जोडिएको छ । मन्त्रीज्यूले त नैतिकताका आधारमा राजीनामा दिनुभयो । मुख्यमन्त्रीज्यूले नैतिकतका आधारमा के गर्नुहन्छ ? सभामुखमार्फत सरकारलाई सोध्न चाहन्छु ।’

विधेयक सदनमा नआउँदै रकमको चलखेल भएको बताउँदै उनले अडियो प्रकरणको छानबिनका लागि उच्चस्तरीय समिति बनाउन माग गरिन् । ‘यो समग्र सुदूरपश्चिमसंग जोडिएको विषय हो,’ उनले भनिन्, ‘हामी प्रतिपक्षी दलहरु उच्चस्तरीय छानबिन समितिको माग गर्न चाहन्छौं ।’ 

अडियोमा मन्त्री चौधरीसंगै सचिवालयका कर्मचारी र केही काठ व्यवसायीको आवाज सुन्न सकिन्छ । उनीहरुबीच दिगो वन व्यवस्थापन कार्यविधि निर्माणका लागि आर्थिक चलखेलका विषयमा कुराकानी भएको छ । अडियोमा मन्त्री चौधरीदेखि मुख्यमन्त्री र नागरिक उन्मुक्तिका केन्द्रीय नेतालाई समेत यो कार्यविधि पास गर्न आर्थिक हिस्सा दिनुपर्ने विषयको कुराकानी सुनिन्छ । 

यता अडियो प्रकरणपछि मन्त्री पदबाट राजीनामा दिएका मन्त्री चौधरीका अनुसार उक्त अडियो भदौ महिनाको हो । ‘म भर्खर मन्त्री भएको समयमा केही व्यक्ति भेट्न आएका थिए,’ उनले भने, ‘अडियोमा भएका कुराकानी चिया गफ भइरहेको समयमा हुन् । त्यो समयमा मलाई केही पनि जानकारी थिएन । मेरो इच्छा नहुँदा नहुँदै उनीहरुले कुराकानी गरेका हुन् ।’

मन्त्री चौधरीले पदबाट राजीनामा दिँदै छानबिनका लागि मार्गप्रसस्त गरेको पनि बताएका थिए ।