धनगढी । २७ चैतमा सुदूरपश्चिम विश्वविद्यालयका आंगिक क्याम्पसमा हुने स्वतन्त्र विद्यार्थी युनियन (स्ववियु)को निर्वाचनका लागि मनोनयन दर्ता सुरु भएको छ ।

सुदूरपश्चिम विश्वविद्यालयको केन्द्रीय अनुगमन तथा समन्वय समितिले सार्वजनिक गरेको निर्वाचन तालिकाअनुसार सोमबार बिहान ११ बजेदेखि मनोनयन दर्ता सुरु भएको हो । दिउँसो २ बजेसम्म उम्मेदवारी दर्ताको समय निर्धारिण गरिएको समितिले जनाएको छ । 

यस्तै, बेलुका ५ बजे उम्मेदवारको नामावली प्रकाशन, १९ गते १० बजेदेखि १ बजेसम्म दाबीविरोध, ५ बजे उम्मेदवारको नामावली प्रकाशन, २० गते उम्मेदवारी फिर्ता, २१ गते उम्मेदवारको अन्तिम नामावली प्रकाशन र २७ गते बिहान ८ बजेदेखि दिउँसो ४ बजेसम्म मतदानको समय तोकिएको छ । 

सुदूरपश्चिम विश्वविद्यालय केन्द्रीय क्याम्पससहितका १६ क्याम्पसमा निर्वाचन हुन लागेको हो । कैलालीको कैलाली बहुमुखी क्याम्पस, दुर्गालक्ष्मी बहुमुखी क्याम्पस, टीकापुर बहुमुखी क्याम्पस, डडेल्धुराको त्रिवेणी बहुमुखी क्याम्पस, बैतडीको जगन्नाथ, पाटन र मणीलेक बहुमुखी क्याम्पस, अछामको जनता बहुमुखी क्याम्पस, डोटीको सीताराम र घण्टेश्वर बहुमुखी क्याम्पस, दार्चुलाको गोकुलेश्वर र दार्चुला बहुमुखी क्याम्पस, बाजुराको बडीमालिका र बाजुर क्याम्पस, बझाङको जयपृथ्वी बहुमुखी क्याम्पसमा स्ववियु निर्वाचन हुन लागेको हो । 

यता सुदूरपश्चिम विश्वविद्यालयको केन्द्रीय क्याम्पसमा भने तालबान्दी भएको छ । एकीकृत समाजवादीनिकट अनेरास्ववियू र नेकपानिकट अखिल समाजवादीले संयुक्त रूपमा निर्वाचन संयोजकको कार्यालयमा तालाबन्दी गरेका हुन् । अनेरास्ववियू र अखिल समाजवादीले वास्तविक विद्यार्थीलाई मतदानबाट वञ्चित गराउन खोजिएको भन्दै तालाबन्दी गरेको जनाएका छन् ।