धनगढी । छैठौं एसपीए सुदूरपश्चिम स्पोर्ट्स अवार्ड २०८१ मा खोखोका हेमराज पनेरु र मानमती धामी वर्ष खेलाडी घोषणा भएका छन् । खेलकुद पत्रकार मञ्च कैलालीको आयोजना, सुदूरपश्चिमाञ्चल एकेडेमी एसपीएको मुख्य प्रायोजन तथा सुदूरपश्चिम प्रदेश खेलकुद परिषद्को मुख्य प्रबद्र्धनमा भएको अवार्डमा पनेरु वर्ष खेलाडी पुरुष र धामी वर्ष खेलाडी महिला घोषणा भएका हुन् । 

पनेरु प्रथम खोखो विश्वकपको महिलातर्फ नेपाललाई उपविजेता बनाउने कप्तान हुन् । पनेरुसंगै करातेका मोहमद शेखु आलम र भलिबलका अर्जुन नेपाली मनोनयनमा परेका थिए । धामी प्रथम खोखो विश्वकपको महिलातर्फ नेपाललाई उपविजेता बनाउने खेलाडी हुन् । उनीसंगै बक्सिङकी स्वस्तिका तिरुवा र कबड्डीकी मानमती बिष्ट मनोनयनमा परेका थिए । अवार्ड विजेता पनेरु र धामीले नगद ३५–३५ हजार रुपैयाँसंगै ट्रफी पाए । 

यस्तै, कबड्डीका हरिना थापा वर्ष पशिक्षक भएकी छिन् । उक्त विधाको मनोनयनमा कबड्डीकै विष्णु भट्ट र भलिबलका जगदीश भट्ट पनि परेका थिए । थापा नेपाललाई एसियन महिला कबड्डी च्याम्पियनसिपमा पहिलो पटक कास्य पदक जिताउने प्रशिक्षक हुन् । विजेता थापाले नगद ३० हजार रुपैयाँसंगै ट्रफी प्राप्त गरिन् । 

वर्ष युवा खेलाडी भने कबड्डीका सुशील चुनारा भए । बंगलादेशमा भएको चौथो बंगबन्धु पुरुष अन्तर्राष्ट्रिय कबड्डी प्रतियोगितामा नेपाली टोली उपविजेता बन्दा उनले उत्कृष्ट प्रदर्शन गरेका थिए । चुनाराले नगद २५ हजारसहित ट्रफी पाए । उनीसंगै वर्ष युवा खेलाडीको मनोनयनमा फुटबलका निराजन धामी र क्रिकेटका नरेन साउद पनि परेका थिए । 
यस्तै पुरुषतर्फ पौडीका अथर्व सिंह र महिलातर्फ करातेका मनिषा बोहरा सुदूरपश्चिम आइकन घोषित भए । सिंह वल्र्ड एक्वेटिक्स च्याम्पियनसिपको छनोट प्रतियोगितामा नयाँ राष्ट्रिय कीर्तिमान कायम गर्ने खेलाडी हुन् भने बोहरा भुटानको थिम्पुमा भएको आठौँ दक्षिण एसियाली कराते प्रतियोगितामा नेपाललाई स्वर्ण पदक जिताउने खेलाडी हुन् । दुबै विजेता खेलाडीले नगद २५–२५ हजारसहित ट्रफी प्राप्त गरे । पुरुषतर्फ सिंहसंगै क्रिकेटका हेमन्त धामी र कबड्डीका खगेन्द्र जोशी तथा महिलातर्फ कबड्डीका मनिषा जोशी र क्रिकेटकी सावित्री धामी मनोनयनमा परेका थिए । 

यस्तै फुटबलका कमल लामालाई लाइफटाइम एचिभमेन्ट र क्रिकेटकी रितु कनौजियालाई स्पेशल अवार्ड प्रदान गरिएको आयोजक खेलकुद पत्रकार मञ्च कैलालीले जनाएको छ । लामा सुदूरपश्चिममा फुटबल खेलका सुरुवातकर्ता हुन् भने कनौजिया नेपाली महिला क्रिकेट टोलीकी पहिलो ब्याच हुन् । उनी अहिले पनि क्रिकेट खेलाडीकै रुपमा सक्रिय छिन् । उनीहरु दुबै जनाले नगद २५–२५ हजारसहित ट्रफी प्रदान गरिएको छ । 

छैठौं संस्करणको अवार्ड कार्यक्रम मंगलबार धनगढीमा भएको हो । सुदूरपश्चिमका सामाजिक विकासमन्त्री मेघराज खड्काको प्रमुख आतिथ्यता त आयोजक खेलकुद पत्रकार मञ्च कैलालीका अध्यक्ष प्रदीप पाठकको अध्यक्षतामा कार्यक्रम भएको थियो । कार्यक्रममा गायक दुर्गेश थापा लगायतका कलाकारको प्रस्तुति पनि रहेको थियो ।