कैलाली । धनगढी उपमहानगरपालिकाले फुटबलको जग बलियो बनाउने उद्देश्यका साथ ‘ग्रासरुट फुटबल’ कार्यक्रमलाई नगरका १६ वडामा विस्तार गर्ने भएको छ। गतवर्ष चारवटा वडाबाट नमुनाका रूपमा सुरु गरिएको यो अभियानलाई यस वर्षदेखि व्यापक बनाउँदै सबै वडामा पुर्‍याइएको हो।

उपमहानगरपालिकाले हरेक वडामा फुटबल मैदान तयार गरी बालबालिकाहरूलाई नियमित रूपमा व्यावसायिक प्रशिक्षण दिने योजना अघि सारेको छ। गत वर्ष वडा नम्बर ७ को पटेला, वडा नम्बर ११ को दक्षिणकाली र ठेकराज माध्यमिक विद्यालय, वडा नम्बर १६ को घसिटा र वडा नम्बर १८ को चन्द्रोदय माध्यमिक विद्यालयमा यो कार्यक्रम सफल भएको थियो। 

यसैलाई निरन्तरता दिँदै यस वर्ष वडा नम्बर १ को कभर्डहल, वडा नम्बर २ को सुक्ष्म वर्गीकरण केन्द्र नजिकको मैदान, वडा नम्बर ३ को नयाँ बसपार्क र वडा नम्बर ५ को श्रीकृष्ण खेल मैदानमा पनि प्रशिक्षण केन्द्रहरू सञ्चालन गरिनेछन्।

उपनगरपालिकाले यो महत्त्वाकांक्षी कार्यक्रमलाई व्यवस्थित रूपमा अघि बढाउन कैलाली जिल्ला फुटबल संघसँग औपचारिक सम्झौता गरेको छ। सम्झौताअनुसार अब जिल्ला फुटबल संघले नै प्राविधिक पक्ष र प्रशिक्षणको सम्पूर्ण जिम्मेवारी सम्हाल्नेछ।