धनगढी । सुदूरपश्चिमका मुख्यमन्त्री कमलबहादुर शाहले बोलाएको सर्वदलीय बैठक विना निष्कर्ष टुंगिएको छ । प्रतिपक्षी दलहरूको अवरोधका कारण प्रदेशसभा बैठक बस्न नसकेपछि मुख्यमन्त्री शाहले सर्वदलीय बैठक बोलाएका थिए । 

प्रतिपक्षी दलले सरकारले मनलाग्दो ढंगले राजनीतिक नियुक्ति गरेको, जथाभावी बजेट बाँडेको, फजुल खर्च बढाएको र पूर्व उद्योग पर्यटन वन तथा वातावरणमन्त्री लक्ष्मणकिशोर चौधरीको विवादास्पद संवादबारे छानबिनको माग गर्दै प्रदेशसभा बैठकमा विरोध गर्दै आएका छन् ।

चौधरीको आर्थिक लेनदेनसम्बन्धी अडियो छानबिन गर्ने विषयमा सत्ता पक्ष र विपक्षीको फरक मत देखिएपछि बैठक विना निष्कर्ष टुंगिएको एकीकृत समाजवादीका उपनेता प्रकाश रावलले जानकारी दिए । उनका अनुसार प्रतिपक्षी दलहरु माओवादी केन्द्र, एकीकृत समाजवादी र राप्रपाले अडियो काण्डको उच्चस्तरीय संसदीय समिति गठन गर्दै छानबिन गर्नुपर्ने माग अगाडि सारेका थिए । ‘हामीहरुले संसदीय समिति गठन गर्दै अडियो काण्डको छानविन गर्नुपर्ने आग्रह गरेका थियौं,’ उनले भने, ‘सत्ता पक्षले सार्वजनिक लेखा समिति र अख्तियारले उक्त विषयमा छानबिन गर्ने बताएपछि कुरा मिलेको छैन । फेरि बस्ने कुरा भएको छ ।’ 

प्रतिपक्षी दलहरुले आफ्ना माग सम्बोधन नहुँदासम्म प्रदेशसभा बैठक चल्न नदिने अडान कायमै राखेका छन् । यसअघि मंगलबार पनि मुख्यमन्त्री शाहले बोलाएको बैठक निष्कर्षविहीन भएको थियो । 

पूर्वमन्त्री चौधरीले दिगो वन व्यवस्थापन सम्बन्धी कार्यविधि आर्थिक लाभ लिनेगरी बनाउनेबारे छलफल गरेको अडियो गत साता सार्वजनिक भएको थियो । अडियो सार्वजनिक भइसकेपछि उनले राजीनामा दिएका थिए । पूर्वमन्त्रीले राजीनामा दिए पनि अडियोमा मुख्यमन्त्री शाह लगायतको नाम पनि जोडिएको भन्दै प्रतिपक्ष दलहरुले उच्चस्तरीय छानबिन टोलीको माग गर्दै आएका हुन् ।