टीकापुर । कैलालीको टीकापुर बहुमुखी क्याम्पसमा नेविसंघविरुद्व सबै विद्यार्थी संगठन एक भएका छन् । २७ चैतमा हुने स्वतन्त्र विद्यार्थी युनियनको निर्वाचनमा पाँच विद्यार्थी संगठनले नेविसंघविरुद्ध संयुक्त प्यानल बनाएका हुन् । 

संयुक्त प्यानलमा संघीय सरकारको नेतृत्व गरिरहेको नेकपा एमाले, प्रतिपक्षी नेकपा माओवादी केन्द्र, एकीकृत समाजवादीका साथै नागरिक उन्मुक्तिको विद्यार्थी संगठन र विप्लव निकट विद्यार्थी संगठन समेत आवद्ध छन् । 

प्यानलको नेतृत्व अनेरास्ववियुका गोविन्दप्रसाद भण्डारीले गरेका छन् । उनलाई प्यानलले सभापति पदको उम्मेदवार बनाएको छ । यस्तै सचिवमा नागरिक विद्यार्थी समाजका आशिष चौधरी र कोषाध्यक्षमा अखिल क्रान्तिकारीका सुदिप नेपाल उम्मेदवार रहेका छन् । 

पाँच विद्यार्थी संठगनसँग एक्लै भिडेर जीत निकाल्ने दाबी गरिरहेको नेविसंघले सभापतिमा किरण साउँद, सचिवमा छविलाल न्यौपाने र कोषाध्यक्षमा डिम्पल चौधरीलाई अघि सारेको छ । 

स्ववियु निर्वाचन समितिका अनुसार देवाशिष जंग थापाले सभापतिमा स्वतन्त्र उम्मेदवारी दर्ता गरेका छन् । उनले एमालेको विद्यार्थी संगठन अनेरास्ववियुबाट विद्रोह गरेर स्वतन्त्र उम्मेदवारी दर्ता गरेको बताइएको छ । उनले अनेरास्ववियुका केही मत आफूतिर ताने जित्न सहज हुने नेविसंघले आँकलन गरेको छ ।

त्यस्तै आठ जना सदस्यका लागि नेविसंघले समिक्षा शाही, कुशल जैशी, शिशिर तिरुवा, आस्मा चौधरी, इसान लम्साल, मनोज धामी, अनुषा कुमारी चौधरी र शिशिर रावललाई उम्मेदवार बनाएको छ । संयुक्त प्यानलका तर्फबाट सदस्य पदमा अनेरास्ववियुका अनमोल खड्का, जुनाकुमारी चौधरी डगौरा, सपना रावलको उम्मेदवारी परेको छ । 

त्यसैगरी अखिल क्रान्तिकारीका ज्योती सुनार, रिमाकुमारी चौधरी, नागरिक विद्यार्थी समाजका अन्जिना चौधरी, अनु चौधरी र अखिल नेपाल स्वतन्त्र विद्यार्थी युनियन समाजवादीका पल्लवी विकको समेत सदस्य पदमा उम्मेदवारी दर्ता भएको निर्वाचन समितिले जारी गरेको सूचनामा उल्लेख छ । 

निर्वाचनमा समानुपातिकतर्फ चारवटा विद्यार्थी संगठन दर्ता भएका छन् । जसमा नेपाल विद्यार्थी संघ, अखिल क्रान्तिकारी, अनेरास्ववियु र नागरिक विद्यार्थी समाज रहेको निर्वाचन समिति सदस्य डा. धनकृष्ण उपाध्यायले जानकारी दिए । उनका अनुसार निर्वाचनमा एक हजार ५८५ मतदाता छन् ।