धनगढी । सुदूरपश्चिम प्रदेशका मुख्यमन्त्री कमलबहादुर शाहले पूर्वउद्योग पर्यटन वन तथा वातावरणमन्त्री लक्ष्मणकिशोर चौधरीको विवादास्पद अडियोबारे मुख खोलेका छन् । शुक्रबार कैलालीको घोडाघोडी ताल क्षेत्रमा आयोजित कैलाली जिल्ला समन्वय समितिको नवौं जिल्ला सभा उद्घाटन गर्दै मुख्यमन्त्री शाहले उक्त अडियोबारे मुख खोलेका हुन् । 

मुख्यमन्त्री शाहले हालै सार्वजनिक भएको लेनदेनसम्बन्धी अडियो र मन्त्रीको राजीनामा दिएको विषयलाई कोट्याउँदै सुदूरपश्चिम प्रदेश सरकार शून्य सहनशिलताको नीति लिएर अगाडि बढेको बताए । ‘केही दिनअघि विवादित अडियो सार्वजनिक भयो र सम्बन्धित मन्त्रीले नैतिकताका आधारमा राजीनामा दिनुभयो,’ मुख्यमन्त्री शाहले भने, ‘भ्रष्टाचारका सन्दर्भमा प्रदेश सरकार शून्य सहनशिलताको नीति लिएर अगाडि बढेको कुरा प्रष्ट हुन्छ ।’

विवादित अडियोबारे सम्बन्धित निकायले निष्पक्ष छानबिनलाई अगाडि बढाउनुपर्ने बताउँदै उनले त्यसमा व्यक्तिगत र प्रदेश सरकारको सहयोग रहने बताए । ‘दोषी दण्डित हुनुपर्दछ र दोषीले उन्मुक्ति पाउनु हुँदैन,’ उनले भने, ‘अख्तियारले छानबिन प्रक्रिया अगाडि बढाइसकेको छ । यसमा प्रदेश सरकारको सहयोग र समन्वय रहन्छ ।’

अडियो प्रकरणका कारण सदन अवरुद्ध गरेर समाधान नहुने बताउँदै उनले प्रतिपक्षसँग संवाद र सहकार्यबाट अगाडि बढ्न तयार रहेको बताए । ‘१२ घण्टाभित्र राजीनामा विरलै आउँछ,’ उनले थपे, ‘आरोपितले आत्मसाथ गरेर मन्त्रीबाट राजीनामा दिनुभएको छ ।’

काठ व्यवसायी र केही नेताहरुसंग लेनदेनका विषयमा भएको संवाद सार्वजनिक भएपछि मन्त्री चौधरीले शनिबार पदबाट राजीनामा दिएका थिए । लेनदेनको छलफलमा पूर्वमन्त्री चौधरीले मुख्यमन्त्री कमलबहादुर शाह, नागरिक उन्मुक्ति पार्टीका संरक्षक रेशमलाल चौधरी, अध्यक्ष रञ्जीता श्रेष्ठलाई मिलाउनुपर्ने कुरा पनि गरेका थिए ।

उक्त अडियोमा एमालेका नेता तथा पूर्ववनमन्त्री नारदमुनि रानाको आवाज पनि छ । अडियोमा मुख्यमन्त्री लगायतका नेताहरुको नाम जोडिएको भन्दै प्रतिपक्षी दलहरुले उच्चस्तरीय छानबिनको माग गर्दै आएका छन् ।