धनगढी । कैलालीमा लागूऔषधसहित सात जना पक्राउ परेका छन् । लागूऔषध ब्युरो धनगढी, जिल्ला प्रहरी कार्यालय कैलाली र मातहतबाट खटिएको प्रहरी टोलीले सात जनालाई पक्राउ गरेको हो । ११ ग्राम ७३० मिलिग्राम लागूऔषध खैरो हेरोइनसहित सात जनालाई पक्राउ गरिएको हो ।

धनगढी उपमहानगरपालिका–४ बाट २७ वर्षीय महेश भट्टलाई पक्राउ गरिएको छ । उनको साथबाट दुई ग्राम ४७० मिलिग्राम खैरो हेरोइन बरामद गरिएको छ । यस्तै धनगढी उपमहानगरपालिका– १२ पट्टीघाटबाट वडा नम्बर ७ बस्ने १८ वर्षीय राजेश राना र २५ वर्षीय राम गोपाल रानालाई पक्राउ गरिएको छ । उनीहरुको साथबाट एक ग्राम ३४० मिलिग्राम खैरो हेरोइन बरामद भएको जिल्ला प्रहरी कार्यालय कैलालीका सहप्रवक्ता प्रहरी निरीक्षक दर्शन खड्काले जानकारी दिए । 

यस्तै जानकी गाउपालिका–९ खैरीफाटा बस्ने १९ वर्षीय सचिन रावल पनि पक्राउ परेका छन् । तीन ग्राम ९८० मिलिग्राम खैरो हेरोइनसहित उनलाई पक्राउ गरिएको खड्काले बताए । धनगढी उपमहानगरपालिका–४ यातायात कार्यालय नजिकबाट २८ वर्षीय गोपाल रामजाली मगरलाई पनि पक्राउ गरिएको छ । उनलाई ५१० मिलिग्राम लागूऔषधसहित पक्राउ गरिएको हो ।

धनगढी उपमहानगरपालिका–८ संगम टोल बस्ने २८ वर्षीय सुरेश चौधरी र २८ वर्षीय मनिष चौधरीलाई पनि पक्राउ गरिएको छ । उनीहरुको साथबाट एक ग्राम ५९० मिलिग्राम र एक ग्राम ८४० मिलिग्राम खैरो हेरोइन बरामद भएको छ ।