धनगढी । सुदूरपश्चिम प्रदेश लगानी तथा विकास सम्मेलनको मिति नजिकिदै गर्दा सुदूरपश्चिमका मुख्यमन्त्री सहितको टोली लगानीकर्ता खोज्दै काठमाडौं गएको छ ।

संघीय राजधानी काठमाडौंमा उक्त टोली लगानी गर्नसक्ने सम्भावित क्षेत्रका पदाधिकारी तथा निजी क्षेत्रसंग र लगानीको वातावरण बनाइदिने सरकारी निकायसंग अन्तरक्रिया तथा छलफल गर्न व्यस्त छ । मुख्यमन्त्री कमलबहादुर शाहको सचिवालयका अनुसार बिहीबार काठमाडौंमा उद्योग, वाणिज्य तथा आपूर्ति मन्त्रालयमा विभिन्न मन्त्रालयका पदाधिकारी र निजी क्षेत्रका पदाधिकारीहरुसंग अन्तरक्रिया भएको छ ।

बिहिबार नै सो टोलीले एसियाली विकास बैंक (एडीबी) का पदाधिकारीहरुसंग पनि अन्तरक्रिया गरेको छ । सचिवालयका अनुसार सुदूरपश्चिमको खनिज, जडिबुटी, पस्मिना, पशुपालन, पर्यटन, उद्योग जस्ता क्षेत्रमा लगानी गर्न आग्रह गर्दै विभिन्न प्रस्तावना प्रस्तुत गरिएको छ ।

मुख्यमन्त्रीका शाहका प्रेस तथा जनसम्पर्क सल्लाहकार डम्बर बमले निजी क्षेत्र र सरकारका प्रतिनिधिबाट लगानी सम्मेलनबारे सकारात्मक प्रतिक्रिया र सुझाव आइरहेको बताए ।

टोलीले शुक्रबार संस्कृति, पर्यटन तथा नागरिक उड्डयन मन्त्रालयमा निजी क्षेत्रका लगानीकर्ता र सरकारी प्रतिनिधिबिच अन्तरक्रिया र परराष्ट्र मन्त्रालय डिप्लोम्याट्स, विकास साझेदार र सरकारी प्रतिनिधिबिच अन्तरक्रिया राखिएको छ भने शनिबार विश्व हिन्दु इक्नोमिक फोरमसंग अन्तरक्रिया राखिएको छ । सो कार्यक्रममा पनि निजी क्षेत्रका लगानीकर्तासंग प्रदेशको टोलीले अन्तरक्रिया गर्ने कार्यक्रम छ ।

शनिबार नै निजी क्षेत्रका व्यवसायिक संघ–संगठनहरुसंग अन्तरक्रिया गर्ने र आइतबार ऊर्जा, जलस्रोत तथा सिंचाई मन्त्रालयमा ऊर्जा क्षेत्रका लगानीकर्ता र सरकारी प्रतिनिधिसंग अन्तरक्रिया गर्ने कार्यक्रम तय भएको छ ।

लगानीकर्ता खोज्दै काठमाडौं पुगेको टोलीमा प्रदेशका मुख्यमन्त्री शाहसंगै आर्थिक मामिलामन्त्री बहादुरसिंह थापा, नेकपा एमाले संसदीय दलका प्रमुख सचेत चक्र मल्ल, नेकपा एकीकृत समाजवादी पार्टीको संसदीय दलका सचेतक तथा पूर्वआर्थिक मामिलामन्त्री नरेशकुमार शाही, नेकपा माओवादी केन्द्रका सांसद् शिवसिंह ओली, प्रदेश नीति तथा योजना आयोगका उपाध्यक्ष डा. जीवन राना, सदस्य नृपबहादुर सुनार र प्रदेशका प्रमुख सचिव डा. कमलप्रसाद पोख्रेल सहभागी भएका छन् ।

प्रदेश सरकारले मंसिर १ र २ गते धनगढीमा आयोजना गरिने लगानी सम्मेलन लक्षित गरेर केही कानुनहरु लगानीमैत्री बनाउने उद्देश्यसहित संशोधन गर्ने तयारी गरेको छ भने लगानी सम्मेलन मुल आयोजक समितिले सम्मेलनमा सोकेस गरिने आयोजनाहरुको सूचीकरण समेत गरेको छ ।