धनगढी । सुदूरपश्चिम प्रदेशका ४० वटा स्थानीय तहमा नयाँ प्रमुख प्रशासकीय अधिकृत (हाकिम) आउने भएका छन् । संघीय मामिला तथा सामान्य प्रशासन मन्त्रालयले १२२ जना उपसचिव र ९७ शाखा अधिकृतको एकैपटक सरुवा गर्दा सुदूरपश्चिमका ४० स्थानीय तहले नयाँ प्रमुख प्रशासकीय अधिकृत पाएका हुन् । 

प्रदेशका २१ वटा गाउँपालिकामा शाखा अधिकृत तथा सो सरहका कर्मचारीलाई प्रमुख प्रशासकीय अधिकृतका रुपमा पठाइएको छ भने १९ वटा नगरपालिकामा उपसचिवलाई प्रमुख प्रशासकीय अधिकृतका रुपमा पठाइएको छ ।

यससँगै गाउँपालिका र नगरपालिकामा निमित्त प्रमुख प्रशासकीय अधिकृत शून्य भएको सरकारको दाबी छ । संघीय मामिला तथा सामान्य प्रशासन मन्त्रालयका अनुसार निजामती सेवा ऐन, २०४९ अनुसार अवकाशको चरणमा रहेका कर्मचारीबाहेक, मन्त्रालयले पारदर्शिता, कार्यकुशलता र भौगोलिक क्षेत्रको अनुभव दिलाउने गरी प्रमुख प्रशासकीय अधिकृत खटाइएको छ ।

त्यसक्रममा दुई वर्षभन्दा बढी मन्त्रालय वा अन्तर्गत कार्यरत, उपत्यका केन्द्रित कार्यालयमै सीमित, स्थानीय तहमा काम नगरेका, प्रदेशमा कामकाजका लागि खटिएका तथा फाजिल वा अतिरिक्त समूहमा रहेका कर्मचारीलाई प्राथमिकतामा राखिएको छ ।