१औँ महाधिवेशनका लागि नेकपा (एमाले)ले आज सुदूरपश्चिमबाट पनि प्रतिनिधि छनोट गर्दै छ । प्रदेशभरबाट १४१ जना प्रतिनिधि छनोट भइरहेको एमाले सुदूरपश्चिमले जनाएको छ ।

प्रदेश सचिव रणबहादुर चन्दका अनुसार प्रदेशका १६ वटा निर्वाचन क्षेत्रबाट १२९, कलस्टरबाट ७ र प्रदेश कमिटीबाट ५ गरी १४१ जना प्रतिनिधि छनोट भइहेको छ । ‘कतिपय जिल्लामा सहमतिकै आधारमा प्रतिनिधि छनोट भइरहेको छ भने कतिपय जिल्लामा निर्वाचन प्रक्रिया अगाडि बढेको छ,’ चन्दले भने, ‘आज बेलुकासम्म प्रतिनिधि छनोट गरिसक्छौँ ।’

चन्दका अनुसार कैलालीबाट ३०, कञ्चनपुरबाट १६, अछामबाट १५, बाजुराबाट १६, बैतडीबाट १५, दार्चुलाबाट १२, डोटी र बझाङबाट १०–१० तथा डडेल्धुराबाट ५ जना प्रतिनिधि महाधिवेशनका लागि छनोट भइरहेको छ । यस्तै, कैलाली र कञ्चनपुरबाट कलस्टरतर्फबाट ७ जना प्रतिनिधि छनोट भइरहेको छ । ‘संघीय निर्वाचन क्षेत्रबाट खुला, महिला, दलित तथा युवा क्लस्टरबाट प्रतिनिधि छनोट भइरहेको छ,’ चन्दले भने ।

उता बाजुरामा भने सर्वसम्मत प्रतिनिधि छनोट गरिएको छ । खुला, महिला, दलित र युवा क्लस्टरमा १६ जना प्रतिनिधि छनोट गरिएको हो । 

खुलातर्फ लालबहादुर ओली, जनककुमार बोहरा, बलदेव रेग्मी, गगन रावल, भरत थापा, मनलाल विष्ट र मेघराज शाही छनोट भएका छन् । महिलातर्फ सीता थापा, देवु खाती, पार्वती थापा विष्ट र बसन्ती गुरुङ छानिएका छन् । 

दलिततर्फ काशी बिक, गौरी सार्की, अमर बिक र राजकला सार्की छानिएका छन् । ४० वर्ष मुनिको युवा क्लस्टरमा नरेश रोकाया सर्वसम्मत छनोट भएका छन् ।