धनगढी । राष्ट्रिय स्वतन्त्र पार्टीका सभापति रवि लामिछानेले आसन्न निर्वाचनलाई ऐतिहासिक अवसरका रुपमा लिन आग्रह गरेका छन् । कैलालीको धनगढीमा रास्वपाले आयोजना गरेको परिवर्तन उद्घोष सभालाई सम्बोधन गर्दै लामिछानेले आफ्नै हातले इतिहास लेख्ने अवसर आएको बताएका हुन् ।

‘देशका लागि अब एकसाथ हिड्नुपर्छ भनेर रवि–बालेनहरु भोलि आउँछन्, आउँदैनन् थाहा छैन । तर अहिले आएका छन्,’ लामिछानेले भने, ‘यसलाई राष्ट्रिय अवसर र उत्सवका रुपमा लिनुपर्छ ।’

लामिछानेले सुदूरपश्चिमका अधिकारलाई माग बनााएर वर्षाैसम्म अल्झाउन काम अब बन्द हुनुपर्ने बताए । ‘सटर त एउटा बन्द हुनुपर्छ,’ उनले भने, ‘के हाम्रो बन्द हुनुपर्छ, के अरुको । कुशासनको, बेथिती, बेरोजगारी र अशिक्षाको सटर बन्द गर्ने हो । २१ गते इतिहास रच्ने हो ।’

पार्टीको एजेण्डा वर्षाैसम्म भोट बैंक बनाउने र जनताको मागलाई घोषणापत्रमा लेख्ने युगलाई बन्द गर्ने लामिछानेको दाबी छ । ‘जनताको माग हो, पूरा गर्नुपर्छ,’ उनले भने, ‘त्यसैले पाँच वर्षको स्थायी सरकार मागेका छौं । पहिलोपटक कुनै राजनीतिक दलले जनतासंग सम्झौता गरेको छ ।’ उनले समानुपातिक र प्रत्यक्षतर्फ मत नबाड्न आग्रह गर्दै देशको अस्तित्व जोगाउनका लागि रास्वपाको पक्षमा मतदान गर्न आग्रह गरे ।