धनगढी । नेपाली काँग्रेसका कैलाली क्षेत्र नम्बर १ का प्रतिनिधिसभा सदस्य उम्मेदवार जनकराज चौधरीले आफ्नो संकल्पपत्र सार्वजनिक गरेका छन् । फागुन २१ गते हुन गइरहेको निर्वाचनलाई लक्षित गर्दै आयोजित एक समारोहमा चौधरीले ‘समुन्नत, समावेशी र विकासोन्मुख कैलाली क्षेत्र नम्बर १” निर्माण गर्ने भन्दै  संकल्पपत्र सार्वजनिक गरेका हुन् ।

चौधरीले सार्वजनिक गरेको संकल्पपत्रमा शिक्षा, कृषि, युवा तथा रोजगारी, पर्यटन, थारू समुदायको पहिचान, स्वास्थ्य, पूर्वाधार, वातावरण संरक्षण र सुशासनलगायतका विषयलाई प्राथमिकतामा राखिएको छ । उनले ‘विकास सबैका लागि, अवसर सबैका लागि’ भन्ने मूल मन्त्रका साथ समावेशी, आत्मनिर्भर र समृद्ध निर्वाचन क्षेत्र निर्माण गर्ने लक्ष्य अघि सारेका छन् ।

‘शिक्षा नै लोकतन्त्र र विकासको मूल आधार हो’ भन्ने नारासहित चौधरीले सामुदायिक विद्यालयहरूको गुणस्तर सुधार, दक्ष जनशक्ति विकास, डिजिटल कक्षा सञ्चालन तथा अंग्रेजी र सूचना प्रविधि शिक्षामा जोड दिने योजना प्रस्तुत गरेका छन् ।

उत्तः क्षेत्रमा रहेका प्राविधिक शिक्षालयहरूको स्तरवृद्धि गर्न सिटिईभिटी अन्तर्गतका कार्यक्रम सुदृढ बनाइने उनले बताए । त्यसैगरी कृषि विधालय, प्राकृतिक स्रोत व्यवस्थापन कलेज र टीकापुर पोलिटेक्निक इन्स्टिच्यूटसँग सहकार्य गरी प्राविधिक तथा व्यावसायिक शिक्षालाई रोजगारीसँग प्रत्यक्ष जोड्ने योजना छ ।
गरिब, थारू, दलित, महिला तथा सीमान्तकृत समुदायका विद्यार्थीहरूका लागि ‘सांसद छात्रवृत्ति कोष’ स्थापना गरिने तथा स्पष्ट कार्यविधि बनाएर कार्यान्वयन गरिने प्रतिबद्धता जनाइएको छ ।

त्यस्तै, टीकापुर बहुमुखी क्याम्पस, वीरेन्द्र विद्या मन्दिर क्याम्पस र रघुनाथ बहुमुखी क्याम्पस को भौतिक पूर्वाधार, प्रयोगशाला र पुस्तकालय सुदृढीकरण गरिने उल्लेख छ। प्रारम्भिक तहमा मातृभाषामा आधारित शिक्षा प्रवर्द्धन गर्ने योजना पनि संकल्प पत्रमा समेटिएको छ।

‘कृषि अर्थ व्यवस्थाको मेरुदण्ड हो’ भन्ने अवधारणासहित चौधरीले सिँचाइ विस्तार, कृषि यान्त्रिकीकरण र जलवायु अनुकूल खेती प्रणालीमा जोड दिएका छन्। विशेषगरी रानी जमरा कुलरिया सिँचाइ आयोजना को विस्तार तथा प्रभावकारी कार्यान्वयनलाई प्राथमिकता दिइनेछ।

धान, गहुँ, मकै, तरकारी, माछापालन र पशुपालनमा व्यवसायिक कृषि प्रवर्द्धन, संकलन केन्द्र र शीतभण्डार स्थापना, कृषि प्रशोधन उद्योग विस्तार तथा किसानलाई सहुलियत ऋण र बिमा सुविधा सुनिश्चित गर्ने योजना अघि सारिएको छ।

थारू समुदायको परम्परागत कृषि ज्ञानलाई आधुनिक प्रविधिसँग जोड्ने, युवालाई कृषि उद्यमशीलतातर्फ आकर्षित गर्ने र कृषि स्टार्टअपका लागि ‘सिड मनी’ उपलब्ध गराउने नीति लिइने उल्लेख छ।

टीकापुरमा स्थापना भएको सुदूरपश्चिम विश्वविद्यालय अन्तर्गतको कृषि शिक्षालयसँग सहकार्य गरी किसान–शिक्षक–विद्यार्थीबीच सहकार्यात्मक कार्यक्रम सञ्चालन गरिने चौधरीले बताएका छन्। साथै केरा, च्याउ, डेरी र मत्स्यपालनजस्ता उच्च मूल्यका कृषि उत्पादनमा वृद्धि गर्न नीति निर्माणको पहल गरिनेछ।
“विदेश होइन, गाउँमै अवसर” भन्ने नारासहित चौधरीले युवा लक्षित कार्यक्रमहरू अघि सारेका छन्। सिप विकास तथा उद्यमशीलता केन्द्र  स्थापना गर्ने, ‘पढौ र कमाउ’ कार्यक्रम सञ्चालन गरी बारिस्टा, डिजिटल मार्केटिङ, इभेन्ट म्यानेजमेन्ट, ग्राफिक डिजाइन, आतिथ्य सेवा लगायतका तालिम सञ्चालन गर्ने योजना सार्वजनिक गरिएको छ।

युजिसी नेपालद्वारा टीकापुर बहुमुखी क्याम्पस मा स्थापना गरिएको इन्क्युबेशन सेन्टरसँग सहकार्य विस्तार गरिने उल्लेख छ। वैदेशिक रोजगारीबाट फर्किएका युवाका लागि पुनःस्थापना कार्यक्रम, सार्वजनिक–निजी साझेदारीमार्फत रोजगारी सिर्जना, श्रमिकको सामाजिक सुरक्षा सुनिश्चितता तथा प्रत्येक वर्ष सय जना युवालाई कृषि तथा उद्यमशीलता क्षेत्रमा ‘सिड मनी’ प्रदान गर्ने योजना पनि समेटिएको छ।

“अतिथि देव भवः” भन्ने नारासहित चौधरीले कैलाली क्षेत्र नम्बर १ लाई पर्यटन सर्किटका रूपमा विकास गर्ने योजना अघि सारेका छन्। टीकापुर पार्क, घोडाघोडी ताल, बर्दिया राष्ट्रिय निकुञ्ज र चिसापानी क्षेत्र जोडेर पर्यटकीय मार्ग निर्माण गर्ने योजना छ।

थारू सांस्कृतिक पर्यटन, होमस्टे प्रवर्द्धन, सांस्कृतिक एकाडेमी स्थापना तथा धार्मिक धरोहरहरूको संरक्षणमा जोड दिइने उल्लेख छ। पदमप्रकाशेश्वर र कैलाशेश्वर जस्ता धार्मिक स्थलको विकासमार्फत धार्मिक पर्यटन प्रवर्द्धन गरिने योजना पनि संकल्प पत्रमा समेटिएको छ। यहाँका चर्च, मदरसा, मन्दिर र गुम्बाको संरक्षण तथा धार्मिक सहिष्णुतामा जोड दिइने उल्लेख छ।

‘पहिचान र सम्मानसहितको विकास’ भन्ने लक्ष्यसहित थारू भाषा, संस्कृति, कला र पर्वहरूको संरक्षण तथा प्रवर्द्धन गर्ने प्रतिबद्धता व्यक्त गरिएको छ। थारू सांस्कृतिक केन्द्र र सङ्ग्रहालय स्थापना, विकास प्रक्रियामा समान सहभागिता तथा सबै समुदायबीच सामाजिक सद्भाव सुदृढ गर्ने योजना प्रस्तुत गरिएको छ।
‘स्वास्थ्य नागरिकको मौलिक अधिकार हो’ भन्दै चौधरीले टीकापुर अस्पताल लाई १०० शय्यामा स्तरोन्नति गरी विशेषज्ञ सेवा विस्तार गर्ने घोषणा गरेका छन्।
प्राथमिक स्वास्थ्य केन्द्रहरूको स्तरोन्नति, चिकित्सक र औषधि आपूर्ति सुनिश्चितता, मातृशिशु स्वास्थ्य सेवा सुदृढीकरण, विपन्न वर्गका लागि स्वास्थ्य बिमामा सहज पहुँच र महिला स्वास्थ्य स्वयंसेविकालाई थप प्रभावकारी बनाउने नीति समेटिएको छ।

सडक, सिँचाइ, ऊर्जा र सूचना प्रविधिमा विशेष जोड दिँदै चौधरीले टीकापुर–सनकट्टी, टीकापुर–जोशीपुर–भजनी तथा अन्य ग्रामीण सडकहरू कालोपत्रे गर्ने प्रतिबद्धता जनाएका छन्। सेती लोकमार्ग निर्माणमा तीव्रता, कर्णाली करिडोर विस्तार, जल यातायात र जल पर्यटन प्रवर्द्धन, तथा दीर्घकालमा टीकापुर क्षेत्रमा सुख्खा बन्दरगाह निर्माणको पहल गरिने उल्लेख छ।

साथै रानी–जमरा–कुलरिया सिँचाइ आयोजनाबाट उत्पादित विद्युतमा स्थानीयबासीको स्वामित्व सुनिश्चित गर्ने योजना पनि अघि सारिएको छ। वन, नदी र जैविक विविधता संरक्षण, बाढी तथा कटान नियन्त्रण, फोहोर व्यवस्थापन र स्वच्छ ऊर्जा प्रवर्द्धनमा जोड दिइने उल्लेख छ। जलवायु परिवर्तनबाट प्रभावित किसानका लागि विशेष कार्यक्रम ल्याइने चौधरीले बताएका छन्।

“राजनीति सेवा हो, व्यापार होइन” भन्ने उद्घोषसहित चौधरीले भ्रष्टाचारविरुद्ध शून्य सहनशीलता, नियमित जनसुनुवाइ, वार्षिक ‘सार्वजनिक सांसद’ कार्यक्रम, स्थानीय सरकारसँग प्रभावकारी समन्वय र तथ्यमा आधारित नीति निर्माण गर्ने प्रतिबद्धता व्यक्त गरेका छन्। चौधरीले कैलाली क्षेत्र नं। १ लाई शिक्षित, आत्मनिर्भर, समावेशी र समृद्ध क्षेत्रका रूपमा विकास गर्न आफू प्रतिबद्ध रहेको दोहोर्याउँदै सबै मतदातासँग समर्थनको अपिल गरेका छन्।
मैले ल्याएको संकल्प हुवहुँ कार्यान्वयन गर्न सहज रहेको उनको भनाइ छ । एजेण्डा सृजना नगरि अघि बढ्न नसकिने उनको भनाइ छ ।
विगतमा संविधान सभा सदस्य हुँदा संविधान निर्माणमा जोड दिएको चौधरीको भनाइ छ ।

सार्वजनिक कार्यक्रममा नेपाली काँग्रेसका केन्द्रीय सदस्य रणबहादुर रावल, क्षेत्रिय प्रतिनिधि, नेता तथा कार्यकर्ताको सहभागिता रहेको थियो ।