काठमाडौँ । चीनमा मंगलबार बिहान गएको भूकम्पमा परी मृत्यु हुनेको संख्या ९५ पुगेको र १३० जना घाइते भएका चिनियाँ समाचार संस्था सिन्ह्वाले जनाएको छ । 

पिपल्स डेली अनलाइनका अनुसार बेइजिङ समयअनुसार बिहान ९ बजेर ५ मिनेट जाँदा सिजाङ अटोनोमस रिजनको डिंग्री काउन्टी केन्द्रबिन्दु भएर ६.८ म्याग्निच्युडको भूकम्प गएको थियो । नेपालको राष्ट्रिय भूकम्प मापन केन्द्रले भने भूकम्पको तीव्रता ७ म्याग्निच्युड रहेको बताएको छ । 

भूकम्पबाट नेपालमा भने हालसम्म कुनै मानवीय क्षति नभएको तर केही स्थानमा भवनहरू चर्किएको विवरण भने प्राप्त भएको राष्ट्रिय आपत्कालीन कार्यसञ्चालन केन्द्रले जनाएको छ ।