धनगढी । कैलाली र कञ्चनपुरमा तीन जना फरार प्रतिवादी पक्राउ परेका छन् । पक्राउ पर्नेमा धनगढी उपमहानगरपालिका-७ मनेहरा बस्ने २८ वर्षीय संजित राना, टीकापुर नगरपालिका-१ ब्लक नम्बर १४ बस्ने २६ वर्षीय डायमण्ड विक्रम शाह र कञ्चनपुरका वेदकोट नगरपालिका-९ सुन्दरपुर बस्ने २५ वर्षीय भरतबहादुर बिष्ट रहेका छन् । 

प्रहरीका अनुसार जिल्ला अदालत कैलालीको फैसलाले रानालाई लागुऔषध खैरो हेरोइन मुद्दामा २ महिना कैद सजाय र २ हजार रुपैयाँ जरिबाना तोकिएको थियो भने शाहलाई पनि सोही मुद्दामा १ महिना कैद सजाय तोकिएको थियो । फरार रहेका दुवै जनालाई बुधबार जिल्ला प्रहरी कार्यालय कैलाली मातहत कार्यालयबाट खटिएको प्रहरी टोलीले पक्राउ गरेको जनाएको छ । 

त्यस्तै, जिल्ला अदालत कञ्चनपुरको २०७६ असार १५ गतेको फैसलाले विष्टलाई चोरी मुद्दामा १ महिना कैद सजाय र १ हजार रुपैयाँ जरिबाना तोकेको थियो । त्यसपछि फरार रहेका उनलाई प्रहरी चौकी सुडा, कञ्चनपुरबाट खटिएको टोलीले बुधबार उनकै घर ठेगानाबाट पक्राउ गरेको जनाएको छ ।