धनगढी । डडेल्धुरामा डिजेल र पेट्रोल बोकेको जिप दुर्घटना भएको छ । जिल्लाको अमरगढी नगरपालिका–६ भालुमारेस्थित भीमदत्त राजमार्गमा शुक्रबार बिहान धनगढीबाट बझाङतर्फ जाँदै गरेको सुपप्र ०१००१ ज १६७२ नम्बरको जिप दुर्घटना भएको हो । 

प्रहरीले जिप ७० मिटर तल खसेको बताएको छ । चालक बझाङको सुर्मा गाउँपालिका–२ का २१ वर्षीय रवीन्द्र बोहरासहित जिपमा सवार अन्य ३ जना सकुशल रहेका जिल्ला प्रहरी कार्यालय डडेल्धुराले बताएको छ । 

जिपमा २ ड्रम डिजेल र २ ड्रम पेट्रोल लोड गरिएकोमा डिजेल पूरै पोखिएको र दुर्घटनाको कारण खुल्न नसकेको डडेल्धुरा प्रहरीले बताएको छ ।