बैतडी । बैतडीको पाटनस्थित भीमदत्त बहुप्राविधिक शिक्षालयका कृषि सहायक प्रशिक्षक सुरेन्द्रबहादुर विष्ट मृत फेला परेका छन् । उनी बुटवल उपमहानगरपालिका–७ शिवनगरस्थित सामुदायिक वनमा शुक्रबार मृत फेला परेका जिल्ला प्रहरी कार्यालय रुपन्देहीले जनाएको छ । 

शिक्षालय प्रमुख जीवन पन्तका अनुसार जिल्ला अस्पतालमा चेकजाँच गराउँदा जण्डिसको समस्या देखिएका उनी थप उपचारका लागि केही दिनअघि मात्रै काठमाडौँ गएका थिए । विष्ट बैतडी फर्कने क्रममा सामुदायिक वनभित्र रुखमा झुण्डिएको अवस्थामा मृत फेला परेका बताइएको छ ।  

बैतडीको दोगडाकेदार गाउँपालिका–८ कालागाउँ घर भएका २५ वर्षीय विष्टका श्रीमती, एक छोरा र एक छोरी छन् । विष्ट मृत फेला परेको जानकारी आएपछि उनका आफन्त र परिवारका सदस्य बुटवल गएका छन् ।