काठमाडौँ । चितवन राष्ट्रिय निकुञ्जको टोलीले हानेको गोली लागेर जङ्गली हात्ती मकुना मरेको छ ।

निकुञ्जका सूचना अधिकारी अविनाश थापामगरका अनुसार जङ्गल बाहिर निस्किएर दुःख दिन थालेपछि कोर क्षेत्रतर्फ पठाउने क्रममा निकुञ्ज र सुरक्षार्थ खटिएको नयाँ गोरखगण (क) गुल्म सौराहाका नेपाली सेनाको संयुक्त टोलीमाथि नै हात्ती जाइलागेको थियो । आत्मरक्षाका लागि गोली चलाउँदा मकुना मारिएको हो । 

‘आत्मरक्षाका लागि टोलीले दुई राउन्ड वार्निङ हवाई फायर गरेका थिए । त्यसपछि पनि मकुना थप आक्रामक बन्दै सानो हात्ती खगेन्द्रप्रसादतर्फ आउँदा त्यहाँ सवार रेञ्जर श्याम तामाङ भुइँमा खसेकाले उनको सुरक्षा गर्न अत्यन्तै कठिन भएपछि स्वीप टोलीले मकुनालाई तीन राउन्ड गोली प्रहार गर्दा केही पर गएर फर्किएर आक्रमण गर्न थालेपछि अर्को एक राउन्ड गोली प्रहार गरेको थियो’, निकुञ्जले निकालेको विज्ञप्तिमा उल्लेख छ । 

गोली लागेपछि भागेको मकुना करिब एक किलोमिटर पर ढलेको अवस्थामा भेटिएको निकुञ्जले जनाएको छ ।