धनगढी । अछाम दरबारको उद्घाटन गरिएको छ । सोमबार दरबारको एक कार्यक्रमकाबीच उपप्रधान तथा सहरी विकासमन्त्री प्रकाशमान सिंहले उद्घाटन गरेका हुन् ।

दरबारकाे उद्घाटन गर्दै मन्त्री सिंहले अछामका प्रमुख जिल्ला अधिकारी शिवप्रसाद लम्सालमार्फत गृह मन्त्रालयलाई हस्तान्तरण गरे । सहरी विकास मन्त्रालयले दरबारको पुनर्निर्माण गरेको थियो । 

दरबारको उद्घाटन गर्दै सिंहले देशमा रहेका सम्पदा र संरचनाको विकास तथा विस्तार गर्न आवश्यक रहेको बताए । ती सम्पदालाई आम्दानीको स्रोत बनाउन सकिने उपप्रधानमन्त्री सिंहको भनाइ थियो ।

पुनर्निर्माण गरिसंगै ऐतिहासिक दरबार पुरानै स्वरुपमा देखिएको छ । दुई करोड ४८ लाख लागतमा निर्माण सम्पन्न भएको दरबार तीन सय २० वर्गमिटरमा बनेको छ । दरबार निर्माणको काम २०६७ सालमा सम्पन्न गर्नका लागि राजेन्द्र, साउद, तुल्छिदुर्गा, बडीमालिका र कुवँर गरी पाँच वटा निर्माण कम्पनीसंग २०६५ सालमा सम्झौता भएको थियो । तर, दरबार निर्माणमा थप १४ वर्ष लागेको हो । 

०५८ फागुन ४ गते तत्कालीन विद्रोही माओवादीको आक्रमणबाट अछाम दरबार ध्वस्त भएको थियो । त्यो समयमा मंगलसेन बजारको बीचमा रहेको दरबारमा जिल्लास्थित सरकारी कार्यालय थिए । दरबारमा पहिले जिल्ला प्रशासन कार्यालय, मालपोत, जिल्ला अदालतलगायत कार्यालय सञ्चालन भए पनि सदरमुकाम आक्रमणका बेला भने जिल्ला प्रशासन कार्यालय मात्र थियो ।

आक्रमणमा तत्कालीन प्रमुख जिल्ला अधिकारी मोहनसिंह खत्रीसंगै ५३ सेना, ५९ प्रहरी, दुई निजामती कर्मचारी र आठ सर्वसाधारण गरी एक सय २२ जनाको ज्यान गएको थियो । अछाम दरबारको झन्डै डेढ सय वर्षअघि मंगलसेनका तत्कालीन राजा टीकाभुक शाहको पालामा निर्माण सुरु भएको थियो । सरकारले २०२९ मा अछामी राजाका सन्तान योगेन्द्रबहादुर शाहबाट उक्त दरबार ९० हजारमा किनेको बताइन्छ ।