धनगढी । पूर्वप्रधानमन्त्री एवम् नेकपा माओवादी केन्द्रका अध्यक्ष पुष्पकमल दाहाल प्रचण्ड भोलि टीकापुर आउने भएका छन् । माआ निकट थारु राष्ट्रिय मुक्ति मोर्चाको चौथो राष्ट्रिय सम्मेलन उद्घाटन गर्न अध्यक्ष प्रचण्डसहित माओवादी शीर्ष नेताहरु टीकापुर आउन लागेका हुन् ।

टीकापुरको कान्छीबजारमा हुने सम्मेलनको उद्घाटन अध्यक्ष प्रचण्डले गर्ने कार्यक्रम छ । सम्मेलनको उद्घाटनमा माओवादीका बरिष्ठ उपाध्यक्ष नारायणकाजी श्रेष्ठ, उपाध्यक्ष पम्फा भुसाल, उपमहासचिव वर्षमान पुन, जनाद्र्धन शर्मा, गिरीराजमणी पोखरेललगायत नेताहरु टीकापुर आउने थारु राष्ट्रिय मुक्ति मोर्चाले जनाएको छ ।

मोर्चाका कैलाली अध्यक्ष तिलक चौधरीका अनुसार सम्मेलनमा कञ्चनपुरदेखि झापासम्म तराइका २४ जिल्ला तथा उपत्यका विशेष जिल्लाबाट समेत करिब साढे सात सय जना प्रतिनिधि सहभागी हुने छन् । 

उद्घाटन समारोहमा कैलाली, कञ्चनपुर र बर्दियाबाट जनहभागिता पनि गराउने मोर्चाको तयारी छ । उद्घाटनमा १८ हजार जनाभन्दा बढीको सहभागिता आयोजकले जनाएको छ । फागुन २२ गतेसम्म सञ्चालन हुने सम्मेलनले मोर्चाको नयाँ नेतृत्व पनि चयन गर्ने छ ।