डडेल्धुरा । प्रविधिको क्षेत्रमा विशेष रुचि भएका डडेल्धुराका विपीन साउदले फेसबुकको कमजोरी (बग) पत्ता लगाएर ठूलो सफलता हासिल गरेका छन् । अमरगढी नगरपालिका–५ निवासी साउदले कलिलै उमेरमा फेसबुक तथा इन्स्टाग्रामको माउ कम्पनी मेटाबाट १ हजार अमेरिकी डलर पुरस्कार प्राप्त गरेका छन् ।

सानैदेखि प्रविधिमा रुचि राख्ने साउद हाल टेक्सस इन्जिनियरिङ कलेजमा कम्प्युटर साइन्स एण्ड इन्फरमेसन टेक्नोलोजी (सिएसआइटी) फाइनल इयरमा अध्ययनरत छन् । पहिले वेभ डेभलपमेन्टमा संलग्न साउद अहिले वेभ सेक्युरिटीमा कार्यरत छन्।  पछिल्लो तीन महिनायता उनी ‘बग बाउन्टी हन्टिङ’ मा सक्रिय छन्, जसअन्तर्गत सफ्टवेयर प्रणालीका कमजोरीहरू पहिचान गरी रिपोर्ट गर्ने कार्य गरिन्छ ।

फेसबुकमा फेला परेको गोपनीयता सम्बन्धी कमजोरी उनले फेब्रुअरी ४ मा रिपोर्ट गरेका थिए । फेसबुकको सुरक्षा प्रणालीमा कमजोरी पहिचान गरेर रिपोर्ट गर्ने कार्यलाई प्रविधि जगतमा ठूलो सम्मानका साथ हेरिन्छ । यही कार्यका लागि उनले मेटाबाट नगद पुरस्कार प्राप्त गरेका हुन् ।

‘हामी ठूला कम्पनीहरूको सुरक्षा कमजोरी पत्ता लगाउने काम गर्छौँ । रिपोर्ट गरेपछि कम्पनीहरूले हामीलाई बाउन्टी अर्थात् नगद पुरस्कार दिन्छन्,’ विपीनले भने ।

हालसम्म उनले ५० भन्दा बढी कम्पनीका बगहरू पत्ता लगाई लाखौं रुपैयाँ कमाइसकेका छन्।  सो आम्दानीबाट उनले आफ्नो अध्ययन खर्च बेहोरेका छन् भने परिवारलाई पनि आर्थिक सहयोग गरेका छन् ।

विदेश जाने सोच नराखेका विपीन नेपालमै बसेर प्रविधिको क्षेत्रमा काम गरिरहने बताउँछन् । ‘म नेपालमै बसेर डलरमा कमाइ गरिरहेको छु । किन विदेश जानु हैन र ?’ उनले भने ।

डडेल्धुरा जिल्ला केवल पूर्वप्रधानमन्त्री शेरबहादुर देउवाका कारण मात्र नभई अन्य कारणले पनि चर्चित हुनुपर्ने उनको धारणा छ । ‘हाम्रो ठाउँका मानिसहरूले प्रविधिको क्षेत्रमा पनि केही गर्नुपर्छ । डडेल्धुरालाई चिनाउनुपर्छ,’ उनले थपे ।