काठमाडौं । नेपालमा दोस्रो अन्तर्राष्ट्रिय वैज्ञानिक सम्मेलन बिहीबार हुँदै छ । नेपाल मटेरियल्स साइन्स सोसाइटीको आयोजनामा तथा शिक्षा, विज्ञान तथा प्रविधि मन्त्रालय, सुदूरपश्चिम विश्वविद्यालय, जापानको नेसनल इन्टिच्युट अफ मटेरियल साइन्सेन (निम्स), डब्लुपीआई, माना, अमृत साइन्स क्याम्पस र पुल्चोक क्याम्पसको सह आयोजनामा बिहीबारदेखि सम्मेलन हुने भएको हो ।

ललितपुरको होटल हिमालयमा तीन दिनसम्म सचालन हुने सम्मेलनमा विश्वभरका ४० बढी वैज्ञानिकहरू आउने आयोजकले जनाएको छ ।  

नेपाल, जापान, अमेरिका, भारत, चीन, स्विट्जरल्याण्ड, अस्ट्रेलियालगायत एक दर्जनभन्दा बढी देशका वैज्ञानिक तथा अनुसन्धानकर्ताहरू सम्मेलनमा सहभागी हुनेछन् । 

यस सम्मेलनमा छ वटा विधामा आधारित रहेर ११४ वटा वैज्ञानिक प्रस्तुतीकरण गरिनेछ । सम्मेलनका प्रमुख विषयहरू क्वान्टम मेकानिक्स, ऊर्जा भण्डारण तथा रूपान्तरण, हाइड्रोजन उत्पादन, जलवायु परिवर्तनलगायत रहनेछन् ।