धनगढी । नेपाली काँग्रेसका सभापति शेरबहादुर देउवाको धनगढी उपमहानगरपालिका–४, मा रहेको घरको अगाडि बम राखेको आरोपमा एक जना पक्राउ परेका छन् । जिल्ला प्रहरी कार्यालयले गौरीगंगा नगरपालिकाका दानबहादुर धामीलाई पक्राउ गरेको हो ।

पक्राउ परेका धामीसँग बयान लिने तयारी भइरहेको जिल्ला प्रहरी कार्यालयका प्रहरी निरीक्षक दर्शन खड्काले बताए । गत भदौ ९ गते देउवा निवास अगाडिको बाटोमा भेटिएको बम नेपाली सेनाको टोलीले निश्क्रिय पारेको थियो । 

पूर्वप्रधानमन्त्रीसमेत रहेका देउवाको निवासमा उनका भतिजा एवम् सुदूरपश्चिम प्रदेश सांसद प्रकाश देउवा बस्दै आएका छन् । देउवा धनगढी आउँदा यही घरमा बस्ने गर्छन् ।