बैतडी । किसान सूचीकरण कार्यक्रममा सुदूरपश्चिम प्रदेशका ७५ हजार किसान सूचीकृत भएका छन् । प्रदेशका एक लाख २५ हजार किसान सूचीकरणको प्रक्रियामा रहेका छन् । राष्ट्रिय किसान आयोगले शुक्रबार बैतडीको पाटनमा आयोजना गरेको कार्यक्रममा उक्त तथ्यांक सार्वजनिक गरेको हो । 

किसानलाई परिचयपत्र बाँड्ने उद्देश्यले सुरु भएको सूचीकरणको कार्यान्वयनको प्रभावकारिता बढाउन राष्ट्रिय किसान आयोगका सदस्य, सुदूरपश्चिम प्रदेश सरकारका मन्त्री, बैतडी, दार्चुला, डडेल्धुरा र बझाङका ३७ वटा स्थानीय तहका जनप्रतिनिधिबिच छलफल भएको हो । 

पाटनमा आयोजित कार्यक्रममा सुदूरपश्चिम प्रदेशका भूमि व्यवस्था, कृषि तथा सहकारीमन्त्री वीरबहादुर थापा, राष्ट्रिय किसान आगोगका सदस्य जीवन्ती पौडेल, बैतडी, बझाङ, डडेलधुरा र दार्चुलाका स्थानीय तहका जनप्रतिनिधि सहभागी थिए । 

राष्ट्रिय किसान आयोगका सदस्य जीवन्ती पौडेलका अनुसार २०७७ सालदेखि देशभरि सुरु भएको किसान सूचीकरण कार्यक्रम अन्तर्गत सुदूरपश्चिम प्रदेशका दुई लाख २२ हजार ९७ किसानमध्ये हालसम्म ७५ हजार किसान प्रमाणित भइसकेका छन् । अझै एक लाख २५ हजार ८८८ जना किसानको विवरण सूचीकृत गर्नुपर्ने भएकाले प्रदेश र स्थानीय तहले सहयोग गर्नुपर्ने उनले बताए ।