डोटी । सुदूरपश्चिम प्रदेशका संस्थापक मुख्यमन्त्री त्रिलोचन भट्टले आफ्नो चुनावी घोषणा पत्रमा धनगढी–दिपायल–उरै सडक बनाउने उल्लेख गरेका छन् । 
डोटीबाट फागुन २१ गते हुने प्रतिनिधि सभा सदस्यको निर्वाचनमा नेपाली कम्युनिष्ट पार्टीको उम्मेदवार भएका उनले आफू निर्वाचित भएपछि उक्त सडक ‘फास्ट ट्रयाक’मा निर्माण गरेको प्रतिवद्धता जनाएका हुन् । उनले आफू मुख्यमन्त्री हुँदा प्रदेश मन्त्रिपरिषद् बैठकले निर्णय गरेरै यो सडकलाई भारत र चीनको सीमाना जोड्ने त्रिदेशीय सडकको रुपमा विकास गर्न संघीय सरकारलाई आग्रह गरेको दावी समेत गरेका छन् ।

‘पहिले खुटिया–दिपायल फास्ट ट्रयाक भनेर सुरुवात गरिएको थियो,’ उनले भने, ‘म मुख्यमन्त्री हुँदा प्रदेश सरकारकै आग्रहमा संघीय सरकारले खुटिया–दीपायल हुँदै बझाङमा चीनसँगको उरै नाकासम्म जोड्ने गरी यो सडकको नामाकरण गरी विस्तार गरिएको थियो । हामीले नै पहल गरेर ट्रयाक खोल्ने काम पूरा भएको छ।’ 

प्रतिनिधि सभा सदस्यमा निर्वाचित भएर गएपछि यो सडकलाई अगाडि बढाउन आफूले सरकार र सदनमा आवाज उठाउने उनले बताए । सुदूरपश्चिमको विकासका लागि निकै महत्वपूर्ण रहेको खुटिया–दिपायल–उरै भञ्ज्याङ सडक डोटी र कैलालीमा केही खण्ड कालोपत्रे भए पनि निर्माण कार्यले गति लिन सकेको छैन ।

सहजपुर–बोगटान–दिपायल सडक कालोपत्रे गर्ने योजनालाई पनि संस्थापक मुख्यमन्त्री भट्टले आफ्नो चुनावी प्रतिवद्धतापत्रमा समावेश गरेका छन् । ‘दर्जनौँ ग्रामीण क्षेत्रलाई जोड्ने यो सडकको निर्माण कार्य सुस्त छ,’ उनले भने, ‘सहजपुरदेखि करिब ५० किलोमिटर संघीय सरकारले पिच गरिसकेको छ । म मुख्यमन्त्री हुँदा प्रदेश सरकारले यो सडकको डोटी खण्डलाई प्रदेश गौरवको आयोजनामा राखेको थियो । मेरै पालामा ठेक्का भएर केआइसिंहसम्म यो सडक कालोपत्रे भइसकेको छ । तर पछिल्ला प्रदेश सरकारले यसलाई निरन्तरता दिएन । मेरै पालामा सुरु भएको यो सडक निर्माण कार्यलाई पूरा गर्ने मेरा योजना छ ।’

दिपायलमा ५० सय्याको अस्पताल सञ्चालन, त्रिभुवन विश्वविद्यालय मातहत डोटीमा इन्जिनियरिङ्ग क्याम्पस सञ्चालन, केआइसिंह–शिखर–जोरायल तेलेमार्ग निर्माण, सहजपुर–जोरायल–मुडभरा द्रुत मार्ग निर्माण, वायल–अल्लेवन–घाट लाउने–कोलाखान–सात्फरी सडक स्तरोन्नति गर्ने योजना भट्टले आफ्नो प्रतिवद्धतापत्रमा समावेश गरेका छन् ।

आफू निर्वाचित भएर गएपछि पश्चिम सेती र एसआर सिक्स जलविद्युत आयोजना निर्माण कार्य अगाडि बढाउन सदनमार्फत सरकारलाई निरन्तर दवाव दिने प्रतिवद्धता उनले जनाए । सुदूरपश्चिमको प्रमुख पर्यटकीय गन्तव्य खप्तड क्षेत्रको विकासका लागि खप्तड क्षेत्र विकास कोष स्थापनाको योजनालाई पनि उनले अघि सारेका छन् ।

आफू मुख्यमन्त्री भएका बेला डोटीमा धेरै योजनाहरु कार्यान्वयन भए पनि क्रमागत कतिपय योजना पछिल्ला सरकारले वास्ता नगर्दा अलपत्र अवस्थामा रहेको उनले बताए । आफ्नो कार्यकालमा डोटीमा मात्र करिब एक सय ३० किलोमिटर सडक कालोपत्रे भएको, अधिकांश विद्यालयका भवन निर्माण, ५० सय्याको अस्पताल भवन, जिल्ला अस्पतालदेखि प्रादेशिक अस्पतालको सेवा स्तरोन्नति गरेको उनले दावी गरे ।

आफू मुख्यमन्त्री हुँदा सडक, शिक्षा, स्वास्थ्य, खानेपानी, पूर्वाधार निर्माणका थुप्रै योजनाहरु डोटीमा कार्यान्वयन भएको दावी गर्दै उनले विगतका कामको मूल्याकंन गरेर मतदाताले आफूलाई निर्वाचित गराउँछन् भन्नेमा विश्वस्त रहेको बताए । त्यसबेला र अहिले डोटीमा आउने योजना र बजेटमा ठूलो अन्तर रहेको भट्टको दावी छ । ‘पाँच वर्ष मुख्यमन्त्री हुँदा डोटीसहित सिंगो सुदूरपश्चिमको विकासका लागि इमान्दारितापूर्वक प्रयास गरेँ,’ उनले भने, ‘पूर्वाधार विकाससँगै कानुन निर्माणलगायत क्षेत्रमा त्यसबेला र पछि भएका कामको तुलना नागरिकले गरेकै होलान् । मैले विगतमा आफू पदमा हुँदा इमान्दारितापूर्वक गरेको कामका आधारमा पनि यसपालि जनताले मलाइ निर्वाचित गराउँछन् भन्ने विश्वास लिएको छु ।’